„Öryggi íbúa þarf að vera forgangsmál þjóðarinnar“

17.12.2019 - 14:34
Mynd með færslu
 Mynd: Ágúst Ólafsson - RÚV
Sveitarstjórn Eyjafjarðarsveitar telur óásættanlegt að raforkukerfi landsins sé ekki öruggara en svo að veður geti haft jafn víðtæk áhrif og ljóst varð í óveðrinu á dögunum.

„Eyjafjarðarsveit harmar þá staðreynd að opinberir innviðir hafi brugðist í veðuráhlaupi síðastliðinnar viku,“ segir í ályktun sem sveitarstjórnin hefur sent frá sér.

Nútímasamfélag háð raforku í nær öllu daglegu starfi

Ljóst sé að nútímasamfélag sé háð raforku í nánast öllu daglegu starfi. Því sé óásættanlegt að kerfið sé ekki öruggara en svo að veður geti haft svo víðtæk áhrif sem raun ber vitni. „Á stórum svæðum höfðu íbúar ekki aðgang að rafmagni, heitu vatni, útvarpi, alneti né síma og þannig hvorki með upplýsingar um stöðu mála eða leiðir til að kalla eftir aðstoð í neyð.“

Öryggi íbúanna ógnað á stórum hluta landsins

Á stórum hluta landsins hafi öryggi íbúa því raunverulega verið ógnað og hefði víða geta farið illa ef ekki hefði verið fyrir elju og óeigingirni björgunarsveita og annarra sjálfboðaliða. „Öryggi íbúa, hvar svo sem þeir búa, þarf að vera forgangsmál þjóðarinnar,“ segir í ályktun sveitarstjórnar Eyjafjarðarsveitar.

 

agusto's picture
Ágúst Ólafsson
Fréttastofa RÚV
Síðast:
Þessi þáttur er í hlaðvarpi