Athugið þessi frétt er meira en 2 ára gömul.

Niðurrifi lokið á sementsreitnum

24.07.2019 - 15:33
Mynd með færslu
 Mynd: Magnús Magnússon - Skessuhorn
Lokið hefur verið við niðurrif á öllum mannvirkjum Sementsverksmiðjunnar á Akranesi og búið er að ganga frá svæðinu. Heildarkostnaður við niðurrifið reynist um 150 milljónum króna undir áætlun. 

Skessuhorn greinir frá þessu og hefur eftir Sævari Frey Þráinssyni bæjarstjóra að kostnaður við vinnuna verði um 290 milljónir króna, samanborið við kostnaðaráætlun bæjaryfirvalda upp á 438 milljónir. Akraneskaupstaður var verkkaupi að niðurrifinu en fyrirtækið Work north sá um vinnuna. 

Nú hefur verið gengið frá svæðinu, það sléttað og sáð í það, að því er fram kemur í Skessuhorni. Þar segir jafnframt að nú þegar sé farið að sjást í græn grös. Uppgröftur frá byggingarlóðum í nýjum hverfum var notaður sem yfirlag. 

Mynd með færslu
 Mynd: Einar Rafnsson - RÚV/Landinn
Sementsverksmiðjan setti sinn svip á Akranes í áratugi

Byrjað var að rífa niður Sementsverksmiðjuna í lok árs 2017. Reyndar þurfti þrjár tilraunir til að taka niður sílóin, en síðan hafa mannvirkin verið rifin niður eitt af öðru. Strompurinn, sem hefur verið eitt helsta kennileiti Akraness í hálfa öld, var loks tekinn í mars. Þetta svæði, í hjarta bæjarins, fær nýjan tilgang á næstu árum enda stendur til að stækka miðbæinn og byggja þar íbúðarhús. 

Mynd með færslu
 Mynd: Aðsend mynd - Akraneskaupstaður
Stefnt er að því að svæðið líti svona út