Nánast allt gler brotnaði í nótt: „Þetta var bara rugl“

14.01.2020 - 13:06
Mynd með færslu
 Mynd: Vindaspá frá Veðurstofu Ísla
Bóndi á bænum Fitjarmýri undir Eyjafjöllum segist aldrei hafa upplifað annan eins veðurham og í nótt. Vindhviður mældust 54 metrar á sekúndu á svæðinu í gærkvöld og léku íbúðarhúsið á bænum grátt.

„Það fór allt gler í stofugluggunum og í útidyrahurðinni. Klæðningin á þakinu losnaði og járnplötur fóru af hlöðuþakinu,“ segir Guðbergur Baldursson um ástandið á bænum. Hann lét veðurhaminn þó lítið á sig fá og var að gefa í útihúsum þegar fréttastofa náði tali af honum.

Hann segir þó að ástandið hafi sjaldan eða aldrei verið svona slæmt. Faðir hans hafi búið á svæðinu síðan 1943 og man ekki eftir jafn sterkum vindi.

„Það getur verið hvasst hérna, en ekki svona. Þetta var bara rugl,“ segir Guðbergur Baldursson.

Magnús Kristjánsson, formaður björgunarsveitarinnar Dagrenningar á Hvolsvelli, segir að engin útköll hafi borist sveitinni í nótt vegna veðursins. Bændurnir á svæðinu bjargi sér iðulega sjálfir.

„Hér kunna menn að byggja hús!“ sagði Magnús léttur í bragði í samtali við fréttastofu.