Mótmælafundur breytti engu fyrir Kristján Þór

25.11.2019 - 15:52
Kristján Þór Júlíusson
 Mynd: Fréttir
Kristján Þór Júlíusson, sjávarútvegsráðherra, segir að mótmælafundur á Austurvelli, þar sem þess var krafist að hann segði af sér vegna Samherjamálsins, hafi engu breytt um stöðu hans. „Ég ætla bara að vinna mína vinnu eins og ég hef gert og af bestu samvisku og gæta að hæfi mínu.“

Kristján Þór hefur verið þrýstingi að undanförnu eftir umfjöllun Kveiks og Stundarinnar um Samherjaskjölin en hann var um tíma stjórnarformaður fyrirtækisins. 

Kristján Þór sagði í viðtali við RÚV að hann hefði meðal annars heyrt í Þorsteini Má Baldvinssyni, fyrrverandi forstjóra Samherja, og spurt hvernig honum liði eftir umfjöllunina um Samherjaskjölin en tók jafnframt skýrt fram að hefði ekki haft nein afskipti af rekstri Samherja síðan að hann lét af störfum fyrir tæpum tuttugu árum. 

Halldóra Mogensen, þingmaður Pírata, spurði Kristján Þór í óundirbúnum fyrirspurnatíma á Alþingi í dag um viðbrögð hans við mótmælunum á laugardag . Þar hefðu 4.000 manns mætt með skýra kröfu um að Kristján Þór segði af sér og að ný stjórnarskrá yrði lögfest með auðlindaákvæðinu.  

Halldóra vildi vita hvort afstaða Kristjáns hefði eitthvað breyst eftir fundinn  og hvort honum fyndist að honum væri enn treyst.  Þá vildi hún hversu margir þyrftu að lýsa yfir vantrausti til að ráðherrann axlaði ábyrgð og segði af sér.

Kristján Þór sagðist finna bæði fyrir trausti og vantrausti og það væri eðlilegt í starfi stjórnmálamanna. Störf þeirra væru í eðli sínu umdeild og þau væru síðan lögð í dóm kjósenda á fjögurra ára fresti. „Ég hef engan mælikvarða á það sérstaklega hvenær það er kominn einhver tiltekinn fjöldi, ég er ekki þeirrar gerðar, að hafa slíka talningu á reiðum höndum og þætti vænt um ef þingmaðurinn upplýsti um töfratöluna.“

 

freyrgigja's picture
Freyr Gígja Gunnarsson
Fréttastofa RÚV
Síðast:
Þessi þáttur er í hlaðvarpi