Athugið þessi frétt er meira en 2 ára gömul.

Minnst sex látnir í hitabylgju í Bandaríkjunum

21.07.2019 - 20:03
Mynd: RÚV / RÚV
Minnst sex hafa látist af völdum hitabylgju sem gengur yfir stóran hluta Bandaríkjanna. Á sama tíma hafa hundruð slökkviliðsmanna í Portúgal barist við skógarelda. Nokkrir slösuðust í eldunum, þar af einn alvarlega. 

Bandaríska veðurstofan gaf út viðvörun sem var í gildi alla helgina vegna hitabylgjunnar sem gekk yfir austurströnd og miðvesturríki landsins. Borgarstjórinn í New York lýsti yfir neyðarástandi vegna hitans sem komst hátt í fjörutíu stig. Bæði menn og dýr leituðu leiða til þess að kæla sig í kæfandi hitanum. Víða var brugðið á það ráð að koma upp sérstökum kælistöðvum þar sem fólk gat jafnvel dýft sér ofan í pott fullan af köldu vatni. 

Í Portúgal hafa hundruð slökkviliðsmanna barist við skógarelda. Eldarnir kviknuðu síðdegis í gær og breiddust hratt út. Sterkir vindar gerðu það að verkum að erfitt reyndist að ná tökum á þeim. Þyrlur og flugvélar voru notaðar við slökkvistarf og portúgalski herinn var sendur til aðstoðar. Fjöldi fólks hefur þurft að flýja eldana. 

Skógareldar eru algengir í Portúgal. Þar verður iðulega mjög heitt á sumrin og landið er skógi vaxið. Tugir létust í skógareldum sem geisuðu á sama svæði og nú fyrir tveimur árum. 

 

olofr's picture
Ólöf Ragnarsdóttir
Fréttastofa RÚV