Mynd: EPA-EFE - EPA
Athugið þessi frétt er meira en 4 ára gömul.
Miðborg Afrin „algjörlega“ sigruð
Sýrlenskar uppreisnarsveitir hafa, með hjálp tyrkneska hersins, náð „algjöru“ valdi á miðborg Afrin. Þetta hefur fréttastofa AFP eftir Recep Tayyip Erdogan Tyrklandsforseta. Meirihluti borgarinnar er nú á valdi Tyrkja og bandamanna þeirra, en borgin hefur mátt þola umfangsmiklar sprengjuárásir undanfarna daga. Þjóðvarðsveit Kúrda, YPG, hörfaði þegar uppreisnarsveitirnar náðu valdi á miðborginni, er haft eftir borgarbúa í Afrin.
Tyrkir og bandamenn þeirra gerðu áhlaup á borgina í dag og náðu þegar valdi á nokkrum hverfum borgarinnar. Samkvæmt heimildum Sýrlensku mannréttindavaktarinnar, sem staðsett er í Bretlandi, hefur verið hart barist í borginni. Fleiri en 1.500 manns úr sveitum Kúrda hafa fallið síðan tyrkneski herinn hóf innrás sína í janúar og yfir 200 þúsund manns hafa flúið borgina síðustu þrjá daga vegna vaxandi átaka.
Recep Tayyip Erdogan, forseti Tyrklands. Mynd: EPA
Erdogan Tyrklandsforseti
Földu sig í kjöllurum
Sýrlenskar uppreisnarsveitir, hliðhollar Tyrkjum, segjast hafa ráðist inn í borgina bæði frá austri og vestri. Þaðan hafi þeir náð valdi á hverfunum Ashrafieh og Jamiliyyeh. AFP fréttastofan hefur eftir borgarbúa að íbúar Afrin hafi falið sig í kjöllurum en heyrt vel í átökunum utandyra.
Tyrkneski herinn hefur farið hratt yfir yfirráðasvæði Kúrda í kringum Afrin. Stjórnvöld í Tyrklandi ákváðu að ráðast á YPG, Þjóðvarðsveit Kúrda, sem þau telja vera hryðjuverkasamtök og hernaðararm Verkamannaflokks Kúrda, PKK.
