Málverk af Jóni Baldvin fjarlægt úr matsal MÍ

Nemandi óskaði eftir því að málverkið yrði fjarlægt

Dagbjört Ósk Jóhannsdóttir, sem er í stjórn femínistafélags Menntaskólans á Ísafirði, segir að í kjölfar þess að konur komu fram í janúar og greindu frá samskiptum sínum við Jón Baldvin, hafi nemandi í femínistafélagi MÍ farið þess á leit við starfsfólk skólans að málverkið yrði tekið niður og var það gert samdægurs.

Málverkið olli óþægindum

Jón Reynir Sigurvinsson, skólameistari MÍ, staðfestir að málverkið hafi verið tekið niður. Honum hafi ekki borist formlegt erindi um að láta fjarlægja málverkið heldur hafi það verið gert til að bregðast við ábendingum frá nemendum og starfsfólki um að málverkið ylli fólki óþægindum. Jón Reynir vildi ekki veita upplýsingar um hvar málverkið er nú niðurkomið en segir það ekki hanga lengur á vegg í skólanum.

Málverkið á vegg í meira en þrjá áratugi

Jón Baldvin Hannibalsson var fyrsti skólameistari Menntaskólans á Ísafirði á árinum 1970-1979 en meðal þeirra sem hafa sagt sögur sínar af kynnum við Jón Baldvin undir myllumerkinu #metoo eru fyrrverandi nemendur við skólann. Samkvæmt upplýsingum frá skólanum er málverkið gjöf frá fyrsta útskriftarárgangi skólans og var fært skólanum á 10 ára stúdentsafmæli þeirra árið 1984. Málverkið hefur því hangið uppi í meira en þrjá áratugi. Ekki er sérstök hefð fyrir því að málaðar séu myndir af fyrrverandi skólameisturum. Dagbjört telur að margir nemendur hafi ef til vill ekki áttað sig á því hvaða maður væri á myndinni.

Bryndís Schram, eiginkona Jóns Baldvins, gegndi einnig stöðu skólameistara við skólann á tímabili og kenndi jafnframt tungumál.