Mynd: Pixabay
Lögregla lagði hald á kannabis í söluumbúðum
Lögreglan á Norðurlandi vestra lagði í gær hald á tæplega áttatíu grömm af efni sem talið er kannabis í söluumbúðum. Efnið fannst þegar bíll var stöðvaður og er ökumaðurinn grunaður um akstur undir áhrifum fíkniefna. Fíkniefnahundur aðstoðaði við fundinn en efnið var vandlega falið í vélarrými bílsins. Mennirnir sem voru í bílnum gista nú fangageymslur.
Þetta kemur fram á Facebooksíðu lögreglunnar á Norðurlandi vestra.
Í nógu að snúast hjá fíkniefnahundi og lögreglu
Þar segir að fíkniefnamálum hafi fjölgað talsvert, sem sé áhyggjuefni. Fíkniefnahundur og lögreglumenn hafi haft í nógu að snúast frá því um síðustu helgi.
Sex ökumenn hafi verið stöðvaðir við akstur undir áhrifum ávana- og fíkniefna. Á sama tímabili hafi mál vegna vörslu slíkra efna verið fimm.
Meðal annars hafi verið lagt hald á um sextíu grömm af meintum kannabisefnum, ætluðum til sölu, í síðustu viku. Efnin fundust við húsleit og í ökutækjum.
