Mynd: RÚV
Athugið þessi frétt er meira en 2 ára gömul.
Lögga ákærð fyrir að finna ekki kannabis
Lögreglumaður á Suðurlandi hefur verið ákærður fyrir brot í opinberu starfi. Hann er sagður hafa látið hjá líða að leggja hald á kannabisblandaðan vökva þegar hann var við störf sem lögreglumaður við leit í húsnæði í Hveragerði. Vökvinn var í potti á eldavél.
Í ákærunni, sem var gefin út í byrjun mánaðarins, er lögreglumaðurinn jafnframt ákærður fyrir að hafa ekki sinnt skyldum sínum til að framkvæma frekari leit að ávana-og fíkniefnum í húsnæðinu og leggja hald á nærri 2 kíló af kannabisefnum og tæpa tvo lítra af kannabisblönduðum vökva.
Í ákærunni segir að við leit annarra lögreglumanna daginn eftir hafi þessi fíkniefni fundist og að þau hafi einnig verið þar daginn áður. Er lögreglumaðurinn sagður hafa gerst sekur um stórfellda vanrækslu eða hirðuleysi í starfi sínu með háttsemi sinni.
Fram kom í fréttum Stöðvar 2 í síðustu viku að embætti héraðssaksóknara hefði ákært ellefu lögreglumenn fyrir brot í starfi síðan embættið var stofnað fyrir fjórum árum. Sakfellt hefði verið í átta málum og sýknað í einu en tveimur málum væri enn ólokið.
