Látinn meta kostnað vegna umdeilds hafnargarðs

13.11.2017 - 17:33
Mynd með færslu
 Mynd: RÚV
Dómari við Héraðsdóm Reykjavíkur samþykkti í dag beiðni Reykjavík Developments um að kallaður verði til matsmaður til að meta margvíslegan kostnað sem fyrirtækið telur að hafi hlotist af völdum gamalla hafnargarða á byggingarsvæði sínu. Fyrirtækið krafðist þess í fyrra að Minjastofnun, fyrir hönd ríkisins, greiddi 600 milljónir króna í bætur vegna kostnaðar sem hlotist hefði vegna afskipta stjórnvalda af byggingaframkvæmdum.

Reykjavík Developments hefur síðustu ár unnið að framkvæmdum og uppbyggingu þar sem áður var bílastæði við hús Tollstjóra. Þar undir voru hafnargarðar frá því á fyrri helmingi síðustu aldar, sem komu í ljós þegar byrjað var að grafa. Vitað var af hafnargarði sem gerður var á árum fyrri heimsstyrjaldar. Deilt var hinsvegar um hafnargarð sem fannst, og reistur var árin 1928. Forráðamenn borgarinnar andmæltu því að þetta væru fornminjar. Sigmundur Davíð Gunnlaugsson, þáverandi forsætisráðherra var á annarri skoðun og beitti sér fyrir því að hafnargarðurinn yrði friðaður. Það kom svo í hlut Sigrúnar Magnúsdóttur, starfandi forsætisráðherra, að friða hafnargarðinn.

Þeir sem byrjaðir voru á framkvæmdum voru ósáttir og töldu mikinn kostnað hljótast af því, umfram það sem gera hefði mátt gera ráð fyrir. Þeir kröfðust því bóta upp á meira en hálfan milljarð króna og höfðuðu mál.

Í matsbeiðninni sem samþykkt var í Héraðsdómi Reykjavíkur í dag er meðal annars farið fram á að metinn verði heildarkostnaður Reykjavík Developments af fornleifarannsóknum og undirbúnings- og eftirvinnslu vegna hafnargarðanna tveggja sem voru undir bílastæðinu. Einnig á að meta kostnað við hvorn hafnargarðinn um sig, þann yngri og eldri, og hversu mikið kostnaður fyrirtækisins jókst vegna krafna Minjastofnunar. Þá er sérstaklega spurt hversu mikil áhrif forsætisráðuneytisins hafi haft á það að uppsteypa við framkvæmdirnar tafðist.

Brynjólfur Þór Guðmundsson
Fréttastofa RÚV
Síðast:
Þessi þáttur er í hlaðvarpi