Athugið þessi frétt er meira en 2 ára gömul.

Kveikur fullyrti aldrei að Samherji ætti aflandsfélagið

28.11.2019 - 22:30
Mynd með færslu
 Mynd: Samherjaskjölin - Wikileaks
Fullyrðingar Samherja í tilkynningum fyrirtækisins síðustu daga um meintar rangfærslur RÚV eiga ekki við rök að styðjast og kalla ekki á leiðréttingu eins og fyrirtækið hefur krafist. Þetta kemur fram í yfirlýsingu frá ritstjóra fréttaskýringaþáttarins Kveiks vegna tilkynningar útgerðarfélagsins til fjölmiðla fyrr í kvöld.

Í tilkynningu Samherja var þess krafist Ríkisútvarpið leiðrétti „rangan fréttaflutning,“ um málefni aflandsfélagsins Cape Cod FS. Fullyrt var að RÚV hefði sagt að Samherji hefði átt félagið og að JPC Shipmanagement hefði leppað eignarhald á því. 

Í yfirlýsingu Kveiks kemur fram að fréttaskýringaþátturinn hafi aldrei fullyrt að Samherji ætti eða hefði átt Cape Cod FS á Marshall-eyjum. „Hið rétta er að Kveikur sagði frá því að Samherji notaði félagið og að starfsmaður útgerðarinnar hafi haft prókúru á reikningum þess í norska bankanum.“  Í yfirlýsingunni er síðan vitnað orðrétt í frétt Kveiks:

,,Skoðun DNB á reikningum sem bankinn taldi víst að væru tengdir Samherja tóku meðal annars til félagsins JPC Shipmanagement sem sá um ráðningarsamninga starfsmanna á skipum félagsins víða um heim. Það var sagt móðurfélag annars félags, Cape Cod Fs, á Marshall-eyjum, sem DNB taldi raunar í eigu Samherja. Enda hafði starfsmaður fyrirtækisins verið meðal prókúruhafa reikningsins og stofnandi.“

Þetta séu atriði sem séu byggð á gögnum sem Wikileaks birti á þriðjudag og ýmsir miðlar, meðal annars RÚV og NRK, hafi unnið fréttir upp úr. 

Þá eru í yfirlýsingu Kveiks einnig gerðar athugasemdir við fréttatilkynningu Samherja undir fyrirsögninni „Uppspuni Ríkisútvarpsins“ vegna orða Helga Seljans, fréttamanns Kveiks, í Morgunútvarpinu á Rás 2.

Ummæli Helga Seljan um störf sem hafi tapast í Walvis Bay hafi verið bein tilvitnun í þátt Kveiks um Samherjamálið frá því fyrir hálfum mánuði. Þar sé að finna frásögn Jóhannesar Stefánssonar um þau þúsund störf sem hafi tapast og aðrar heimildir Kveiks styðji þá frásögn, meðal annars skrif namibískra fjölmiðla. 

Kveikur segir ásakanir Samherja í garð Helga um ósannindi vera fráleitar. Þetta sé í raun tilraun fyrirtækisins til að afvegaleiða umræðuna með því að „vega persónulega að fréttamanninum og draga úr trúverðugleika hans.“

Alfarið sé litið framhjá þeim upplýsingum og gögnum sem komu fram í þættinum og ummælin byggðust á. „Fullyrðingar Samherja í tilkynningum fyrirtækisins síðustu daga um meintar rangfærslur RÚV eiga ekki við rök að styðjast og kalla ekki á leiðréttingu eins og fyrirtækið hefur krafist.“ Þar sem Samherji hafi ítrekað hafnað viðtali við Kveik um efnisatriði málsins hafi ekki reynst unnt að fá svör við fjölmörgum spurningum.  

freyrgigja's picture
Freyr Gígja Gunnarsson
Fréttastofa RÚV