Mynd: Eddi - RÚV
Athugið þessi frétt er meira en 2 ára gömul.
Kristján Þór hefur sagt sig frá málum Samherja
Kristján Þór Júlíusson, sjávarútvegsráðherra hefur sagt sig frá málum sem tengjast Samherja og útgerðarfélagi Akureyringa vegna fiskeldis og nytjastofna við Ísland. Sigurður Ingi Jóhannsson samgönguráðherra ber nú ábyrð á þeim. Þetta var ákveðið á ríkisstjórnarfundi í morgun.
Kristján Þór hefur lýst sig vanhæfan í málum sem tengjast Samherja vegna umsóknar félagsins um bráðabirgða rekstrarleyfi til starfrækslu fiskeldisstöðvar á Núpsmýri í Öxarfirði í Norðurþingi. Matvælastofnun synjaði rekstrarleyfinu og hefur Samherji lagt fram stjórnsýslukæru vegna þess. Þá hefur Fiskistofa veitt Samherja skriflega áminningu á grundvelli laga um umgengni um nytjastofna sjávar.
Þá sagði Kristján Þór sig frá máli Útgerðarfélags Akureyringa vegna stjórnsýslukæru félagsins vegna ákvörðunar Fiskistofu um sviptingu leyfis til veiða í atvinnuskyni í tiltekin tíma á grundvelli laga um umgengni um nytjastofna sjávar, samkvæmt upplýsingum frá forsætisráðuneytinu.
Katrín Jakobsdóttir, forsætisráðherra lagði fram tillögu til Forseta Íslands á ríkisstjórnarfundi í morgun um að Sigurður Ingi tæki við þessum málum og að Kristján Þór viki sæti.
