Klækjarefur Donalds Trumps fyrir dóm

Roger Stone er þekktur sem meistari klækjabragðanna, fyrir að vera einstaklega ófyrirleitinn og beita öllum hugsanlegum brögðum til að ná fram markmiðum sínum. Í kosningabaráttu Donalds Trumps sá hann um að dreifa ósannindum og samsæriskenningum. Sjálfur segir hann að leiðarstefið sé árás, árás, árás - aldrei að verjast. Aldrei að viðurkenna neitt, alltaf að neita öllu og gera gagnárás. Donald Trump segir hann einstaklega hæfan á sínu sviði.

Roger Stone var handtekinn í janúar, sakaður um að blekkja rannsóknarnefnd þingsins um tengsl sín við birtingu WikiLeaks á gögnum frá Demókrataflokknum og framboði Hillary Clinton. Stone er sakaður um ljúgvitni, hafa áhrif á vitni og að hindra réttvísina. Sjálfur segist hann saklaus.

Saksóknarinn heldur því fram að Stone hafi fengið gamanleikarann og útvarpsmanninn Randy Credico til að vera í sambandi við Julian Assange, stofnanda WikiLeaks. Hann hafi hvatt Credico til að ljúga að þingnefndinni um þátt sinn í málinu, beita öllum brögðum, neita öllu. Hann á meira að segja að hafa hótað að koma hundinum hans fyrir kattarnef ef hann gerði ekki eins og honum var sagt. Saksóknarinn segir að Roger Stone hafi sagt honum að gera eins og Frank Pentangeli gerði í Guðföðurnum tvö. Sá átti að vitna gegn Don Corleone en breytti framburði sínum á síðustu stundu fyrir þingnefndinni. Sagðist ekkert vita um neina glæpastarfsemi, en hefði verið í ólífubransanum með föður hans. Endur fyrir löngu.

Samkvæmt dómskjölum hvatti Stone Credico til að segja þingnefndinni að vissulega þekki hann Roger Stone, hann hafi verið í ólífubransanum með föður sínum. Endur fyrir löngu. Saksóknarar vildu fá að sýna myndbrot úr Guðföðurnum en því var hafnað. Stone hafnar því alfarið að hafa vitað fyrir fram um leka WikiLeaks. Segist ekkert hafa fengið frá WikiLeaks eða Rússum. Hann hafi engum gögnum komið til Donalds Trumps eða til framboðs hans.

Stone hefur fyrst og fremst verið pólitískur ráðgjafi síðustu fjörutíu árin, einkum fyrir þekkta frambjóðendur Repúblikana. Hann er þekktur fyrir að svífast einskis við öflun vafasamra upplýsinga um andstæðinga og notkun þeirra. Um tíma rak hann ráðgjafafyrirtæki með með Paul Manafort og fleirum. Manafort var um tíma kosningastjóri Donalds Trumps en afplánar nú sjö og hálfs árs fangelsi í tengslum við fjármálamisferli, Úkraínu og Rússland. Skattsvik og fjársvik urðu honum að falli. Manafort og Stone hafa lengi unnið náið með Donald Trump.

Þegar rannsókn Roberts Muellers lauk í maí tók saksóknarinn í Washington við málið Stones. Tveir aðrir sakborningar höfðu þá þegar játað. Michael Flynn, fyrrverandi öryggisráðgjafi Donalds Trumps og Richard Gates, fyrrverandi aðstoðarkosningastjóri Trumps. Þeir bíða dóms. Gates samdi reyndar við ákæruvaldið. Hann vitnaði gegn Paul Manafort og ber að öllum líkindum vitni gegn Roger Stone. Enn á eftir að gefa út ákærur á hendur rússneska fyrirtækinu Concord og framkvæmdastjóra þess, Yevgeny Prigozhin, sem sagður er nátengdur Vladimir Putin. Prigozhin og Concord eiga að hafa dreift óhróðri og falsfréttum í kosningabaráttunni 2016. Í áðurnefndri heimildarmynd segir að Stone hafi verið frumkvöðull í skítadreifingu um andstæðingana og að Washington verði aldrei aftur söm.

Samkvæmt ákærunni ræddi Stone við menn úr innsta hring kosningabaráttu Trumps um að WikiLeaks væri með hættulegar upplýsingar um Hillary Clinton. Milligöngumenn hans hafi verið samsæringasmiðurinn Jerome Corsi og Randy Credico. Þeim upplýsingum hafi hann haldið leyndum fyrir þingnefndinni. Stone á síðan að hafa reynt að þagga niður í þeim með öllum tiltækum ráðum. Ásakanir um vafasöm klækjabrögð á ferlinum eru reyndar legíó og minna helst á afar ótrúverðuga Hollywood bíómynd.