Jórunn Viðar látin

28.02.2017 - 07:45
Mynd með færslu
 Mynd: Ergis - Skjáskot
Jórunn Viðar, tónskáld og píanóleikari, lést í gær. Hún var frumkvöðull á sviði ballett- og kvikmyndatónlistar hér á landi og samdi auk þess fjölmörg þjóðþekkt sönglög.

Jórunn fæddist í Reykjavík 7. desember 1918 , dóttir hjónanna Katrínar Jónsdóttur Viðar og Einars Indriðasonar Viðar.

Jórunn tók burtfararpróf frá Tónlistarskólanum í Reykjavík 1936, átján ára að aldri, eftir nám hjá móður sinni, Páli Ísólfssyni og Árna Kristjánssyni. Hún lauk stúdentsprófi frá frá Menntaskólanum í Reykjavík 1937. Í framhaldinu sigldi hún til Þýskalands þar sem hún hóf framhaldsnám í píanóleik við Hochschule für Musik í Berlín, 1987 til 1939. Árin 1943 til 1945 nam Jórunn tónsmíðar hjá Vittorio Giannini við Juilliard School of Music í New York. Að námi loknu sneri hún aftur til Íslands þar sem hún lét fljótlega mjög að sér kveða í íslensku tónlistarlífi, jafnt sem píanóleikari og tónskáld. Áhrifa hennar á íslenskt tónlistarlíf gætir enn í dag og mun vafalaust gæta áfram um ókomna tíð.

Jórunn var frumkvöðull á sviði ballett- og kvikmyndatónlistar á Íslandi. Hún samdi fyrstu íslensku kvikmyndatónlistina við mynd Ævars Kvaran, Síðasti bærinn í dalnum, og fyrsta íslenska ballettinn, Eld. Annar ballett úr hennar smiðju var Ólafur Liljurós. Þá samdi hún píanókonsertinn Sláttu og fjölmörg þjóðþekkt sönglög, svo sem jólalögin Jól og Það á að gefa börnum brauð. Hún samdi einnig fjölda einsöngslaga, kórlaga og útsetninga á þjóðlögum og þulum. 

Jórunn Viðar var valin borgarlistamaður Reykjavíkur árið 1999. Hún hlaut heiðursverðlaun Íslensku tónlistarverðlaunanna árið 2004 og Menningarverðlaun DV árið 2009. Jórunn hlaut heiðurslaun listamanna frá Alþingi um árabil og var sæmd heiðursmerki hinnar Íslensku fálkaorðu árið 1989.

Jórunn giftist Lárusi Fjeldsted forstjóra. Hann lést árið 1985. Þau eignuðust þrjú börn: Lárus, Katrínu og Lovísu.

Kári Gylfason
Fréttastofa RÚV
Ævar Örn Jósepsson
Fréttastofa RÚV
Síðast:
Þessi þáttur er í hlaðvarpi