Jóhanna Fjóla skipuð forstjóri HVE

21.02.2020 - 07:19
Mynd með færslu
 Mynd: Samsett
Svandís Svavarsdóttir heilbrigðisráðherra hefur ákveðið að skipa Jóhönnu Fjólu Jóhannesdóttur forstjóra Heilbrigðisstofnunar Vesturlands til næstu fimm ára. Hún sótti ein um stöðuna.

Þetta kemur fram á vef ráðuneytisins. Jóhanna Fjóla var sett forstjóri árið 2017 þegar Guðjón S. Brjánsson tók sæti á Alþingi.

 

Jóhanna Fjóla er hjúkrunarfræðingur og hefur starfað við HVE síðan stofnunin varð til 2010. Fyrst var hún framkvæmdastjóri hjúkrunar og rekstrar og verkefnisstjóri þróunar og gæðamála og svo settur forstjóri.

HVE veitir heilbrigðisþjónustu í heilbrigðisumdæmi Vesturlands sem nær til 15 sveitarfélaga frá Hvalfjarðarsveit til Reykhólahrepps og norður í Árneshrepp og Húnaþing Vestra. Stofnunin annast einnig starfsnám í heilbrigðisgreinum og starfar í tengslum við háskóla á sviði fræðslumála heilbrigðisstétta og rannsókna í heilbrigðisvísindum.

Umsóknarfrestur rann út 31. janúar.

 

Ásrún Brynja Ingvarsdóttir
Fréttastofa RÚV
Síðast:
Þessi þáttur er í hlaðvarpi