Jóhann Jóhannsson látinn

Mynd: EPA / EPA

Jóhann Jóhannsson látinn

10.02.2018 - 17:05

Höfundar

Jóhann Jóhannsson tónskáld er látinn, 48 ára að aldri. Hann fannst látinn á heimili sínu í Berlín í gær. Þetta staðfestir umboðsmaður hans, Tim Husom. Jóhann hafði skipað sér sess meðal virtustu kvikmyndatónskálda samtímans.

Jóhann á að baki fjölbreyttan feril með mörgum hljómsveitum, meðal annars rokksveitinni HAM og Apparat Organ Quartet, sem hann stofnaði árið 1999, auk þess sem hann gaf út níu sólóplötur. Hann samdi tónlist fyrir leikhús, stóð fyrir tilraunakenndum listviðburðum af ýmsu tagi en það var kvikmyndatónlistin sem hann varð heimsþekktur fyrir á síðustu árum og var raunar farið að telja hann í hópi helstu kvikmyndatónskálda samtímans.

Hann hlaut fádæma lof fyrir tónlist sína við þrjár kvikmyndir kanadíska leikstjórans Dennis Villeneuves, Prisoners, Sicario og Arrival. Hann hlaut Golden Globe-verðlaun árið 2014 fyrir tónlist sína í kvikmyndinni The Theory of Everything og var jafnframt tilnefndur til Óskars-, BAFTA- og Grammy-verðlauna fyrir þá mynd. Hann var aftur tilnefndur til Óskars- og BAFTA-verðlauna fyrir Sicario árið eftir og til Golden Globe og BAFTA-verðlauna 2016 fyrir Arrival og Grammy-verðlauna ársins 2017 fyrir sömu mynd.

Hann starfaði einnig að myndinni Mother! eftir Darren Aronofsky og nú í byrjun febrúar kom út hjá Deutsche Grammofon tónlist Jóhanns við kvikmyndina The Mercy, með Colin Firth í aðalhlutverki.

Undanfarið hafði Jóhann unnið að tónlistinni við væntanlega kvikmynd um Maríu Magdalenu með Rooney Mara og Joaquin Phoenix í aðalhlutverkum. Jóhann var ókvæntur og lætur eftir sig eina uppkomna dóttur.

Í yfirlýsingu frá Redbird Music, útgáfufyrirtæki Jóhanns, segir að dánarorsök sé ókunn. Þar er haft eftir umboðsmanninum Tim Husom að hann sé mjög sorgmæddur. „Í dag missti ég vin minn sem var einn hæfileikaríkasti tónlistarmaður og greindasti maður sem ég þekkti. Við fylgdumst lengi að.“

Hér má hlýða á tónlist eftir Jóhann úr kvikmyndinni Arrival: