Athugið þessi frétt er meira en 3 ára gömul.

Ísland með í Eurovision - verður í Tel Aviv

Mynd með færslu
 Mynd: Skjáskot

Ísland með í Eurovision - verður í Tel Aviv

13.09.2018 - 10:19

Höfundar

RÚV hefur ákveðið að taka þátt í Söngvakeppni evrópskra sjónvarpsstöðva á næsta ári. Endanleg ákvörðun lá fyrir í morgun þegar ljóst var að Ísraelar, sem halda keppnina, ákváðu að hafa hana í Tel Aviv en ekki Jerúsalem eins og margir höfðu spáð. Allar norrænu sjónvarpsstöðvarnar verða með og segir dagskrárstjóri RÚV í tilkynningu að almannaþjónustumiðlarnir hafi jafnan verið samstíga í slíkum efnum.

Skorað var á RÚV að sniðganga keppnina  vegna ástandsins á Gaza og framferðis stjórnvalda í garð Palestínumanna.  Skarphéðinn Guðmundsson, dagskrárstjóri RÚV, segir í tilkynningu að þær áskoranir hafi verið teknar alvarlega. 

Eftir mikla yfirlegu hafi þó verið tekin sú ákvörðun að senda fulltrúa frá Íslandi. „Sú ákvörðun grundvallast á því að ekki er um pólitískan viðburð að ræða heldur þvert á móti samkomu ólíkra þjóða sem allt frá stofnum hefur haft að megintilgangi og leiðarljósi að breiða út boðskap sameiningar- og friðarkrafts sem felst í dægurtónlist og menningu almennt,“ segir í tilkynningunni.

Skarphéðinn segir það ennfremur hafa vegið þungt að keppnin verður í Tel Aviv en ákvörðunin um keppnisstað lá ekki fyrir opinberlega fyrr en í dag. „Enn hefur ekki heyrst af þjóðum sem hyggjast sniðganga keppnina í Ísrael af pólitískum ástæðum. Almannaþjónustumiðlarnir á Norðurlöndunum hafa jafnan verið samstíga í slíkum efnum og hafa þeir allir nú þegar staðfest þátttöku sína.“

Hópur listamanna birti opið bréf í breska blaðinu Guardian fyrir skömmu þar sem skorað var á Evrópulönd að sniðganga Eurovision í Ísrael.  „Við getum ekki ímyndað okkur að taka þátt í Eurovisiongleðinni með góðri samvisku á meðan Ísraelsríki og þeirra her beitir Palestínumenn hrottalegu ofbeldi í næsta nágrenni,“ sagði í bréfinu en tveir íslenskir listamenn skrifuðu undir það, Daði Freyr og Hildur Kristín Stefánsdóttir.