Athugið þessi frétt er meira en mánaðargömul.

Icelandair tekur þrjár vélar úr rekstri

12.03.2019 - 14:50
Mynd með færslu
 Mynd: RÚV - Jón Þór Víglundsson - RÚV
Icelandair Group hefur ákveðið að taka Boeing 737 MAX 8 flugvélar sínar úr rekstri um óákveðinn tíma. Félagið er með þrjár slíkar vélar í rekstri. Þetta kemur fram í tilkynningu til Kauphallar Íslands.

Þar segir að félagið fylgist náið með þróun mála og vinnur áfram með flugmálayfirvöldum á Íslandi, í Evrópu og Bandaríkjunum varðandi næstu skref. „Miðað við þær upplýsingar sem liggja fyrir, þá öryggisferla sem félagið fylgir, sem og þjálfun áhafna þess, telur félagið vélarnar öruggar,“ segir í tilkynningunni.

Félagið telur að til skamms tíma hafi þessi ráðstöfun óveruleg áhrif á rekstur félagsins þar sem aðeins sé um 3 vélar að ræða af 33 farþegavélum í flota félagsins og félagið hafi svigrúm til að bregðast við á næstu vikum.

Ákvörðunin er tekin eftir að flugmálayfirvöld í Bretlandi bönnuðu fyrr í dag þotum af gerðinni Boeing 737 MAX 8 að lenda og taka á loft frá flugvöllum í landinu. Bretar eru fyrstir Evrópuþjóða til að banna ferðir flugvéla af þessari gerð um lofthelgi sína. Norska flugfélagið Norwegian hefur einnig kyrrsett allar sínar vélar, að því er tilkynnt var síðdegis.

Hlutabréf í Icelandair, sem skráð eru í Kauphöll Íslands, hafa fallið verulega það sem af er degi. Klukkan þrjú í dag nam lækkunin 9 prósentum í um 400 milljóna króna viðskiptum.