Athugið þessi frétt er meira en mánaðargömul.

Icelandair áfram heimilt að fljúga á ákveðna flugvelli

12.03.2020 - 10:05
Icelandair 757-200 TF-FIU
 Mynd: BriYYZ - Flickr
Icelandair verður áfram heimilt að fljúga til og frá ákveðnum flugvöllum í Bandaríkjunum þrátt fyrir tímabundið ferðabann bandarískra stjórnvalda sem tekur gildi á morgun fyrir næstu 30 daga. Takmarkanir gilda fyrir farþega, aðra en bandaríska ríkisborgara, sem dvalið hafa á Schengen svæðinu.

Í tilkynningu frá Icelandair segir að allt flug verður á áætlun í dag og á morgun. Þegar ferðabannið tekur gildi á laugardag, verður flug til eftirfarandi áfangastaða Icelandair í Bandaríkjunum á áætlun: New York (JFK og EWR), Chicago, Seattle og Washington DC en ferðabann gildir þá fyrir alla sem dvalið hafa á Schengen-svæðinu, nema bandaríska ríkisborgara. 

Í fyrri tilkynningu Icelandair í morgun sagði að ferðabannið myndi hafa veruleg áhrif á flugáætlun. Félagið þurfi að draga enn frekar úr framboði á flugi í mars og apríl, umfram þær 80 ferðir sem áður var tilkynnt um. Um 490 flugferðir eru áætlaðar til Bandaríkjanna á tímabilinu.

Þann 14.-16. mars verður öllu flugi til Boston, Minneapolis, Denver og Orlando aflýst. Flug frá Orlando og Denver laugardaginn 14. mars verður á áætlun. Öll flug til Evrópu eru á áætlun. Ferðabannið gildir ekki um fraktflutninga.

„Flugáætlun félagsins í heild sinni er í stöðugri skoðun við þessar fordæmalausu aðstæður og er því breytingum háð. Allar breytingar á flugáætlun félagsins verða birtar á heimasíðu félagsins,“ segir í tilkynningu Icelandair.

andriyv's picture
Andri Yrkill Valsson
Fréttastofa RÚV