Athugið þessi frétt er meira en 2 ára gömul.

Hvað með Daða?

Söngvakeppnin úrslitakvöld 3.mars í Laugardalshöll

Mynd: Tomasz Kolodziejski - RÚV

Hvað með Daða?

23.08.2019 - 13:21

Höfundar

Arnar Eggert Thoroddsen

dagskrárgerðarmaður

Senda skilaboð

Platan & Co. eftir Daða Frey er átta laga plata eftir tölvupoppstónskáldið sem fór mikinn í söngvakeppni sjónvarpsins fyrir tveimur árum. Arnar Eggert Thoroddsen rýnir í verkið, sem er plata vikunnar á Rás 2.

Daði Freyr og Gagnamagnið slógu algerlega í gegn í Söngvakeppninni 2017, nördapoppið („geek-core“) sem er „Hvað með það?“ gekk fullkomlega upp, tónlistarlega sem framkomulega. Hrein unun að sjá þetta fólk dilla sér taktfast við ómótstæðilega melódíuna og með sprenghlægileg stærilæti í bland. Allt þetta flaug inn í hjarta þjóðarinnar. Daði sjálfur gat ekki gert neitt rangt á þessum tíma, sjarmerandi og launfyndinn og vafði þjóðinni um hljómborðsgítarinn sinn eins og ekkert væri. Ég tilheyri þessari þjóð líka og einhvern tíma skrifaði ég á samfélagsmiðla: „ Daði gæti sungið innihaldslýsingu á jógúrtdollu og grætt mann.“

Áberandi

Okkar maður hefur verið sæmilega áberandi síðan, bæði í fjölmiðlum almennt og á tónlistarsviðinu. Hefur haldið tónleika reglubundið og strax um sumarið 2017 gaf hann út lag í kjölfar söngvakeppninnar, lagið „ Næsta skref“ (fimm laga stuttskífu, samnefndri, var svo ofið um það lag). Fleiri stök lög hafa svo komið út, meðal annars „Endurtaka mig“ (þar sem Blær kemur við sögu) sem var nokkurs konar forsmekkur að þessari plötu. Eins og nafnið gefur til kynna, er gestkvæmt á plötunni og hinir og þessir hefja upp raust sína. Félagi Daða frá Berlín, þar sem hann býr, Don Tox, rappar í einu lagi, kona hans Árný syngur eitt lag og sömuleiðis söngkonan Ásdís María Viðarsdóttir. Stórstjörnurnar Arnar Úlfur og Króli leggja þá líka rödd á plóg.

Platan er stutt, og átti að vera styttri. Daði leikur sér með ýmsa stíla, rapplögin eru harðneskjuleg. Nei, það er ekki hægt að nota þetta orð um þennan ljúflingsmeistara. Þau eru bara peppuð, stuðvæn. Allt að gerast. Lög Árnýjar og Ásdísar eru rólegri, ballöðukennd og næstum kvikmyndaleg, einkum það síðarnefnda. Daði opnar plötuna – og lokar henni – einn og óstuddur þar sem hann veltir jarðlífinu fyrir sér á heimspekilega vegu. Hann er lunkinn í textum, gerir grín að sjálfum sér og sér skoplegu hliðina á hlutunum, en brýnir sig samt. Daði er með ákveðið „x“ sem er síst öllum gefið, hann er yfirmáta sjarmerandi og sá eiginleiki fleytir honum langt.

Viðkunnanlegt

Daðapoppið hérna er viðkunnanlegt, ýmsar þreifingar í gangi eins og segir, og forvitnilegt að sjá hvort hann haldi áfram að rækta þennan garð eða hvort hann sái í nýjan reit næst. En hann ætti að halda áfram að sinna tónlistinni, því hæfileikana hefur hann.