Athugið þessi frétt er meira en 2 ára gömul.

Hildur vann Óskarinn fyrst Íslendinga

Hildur Guonadottir accepts the award for best original score for "Joker" at the Oscars on Sunday, Feb. 9, 2020, at the Dolby Theatre in Los Angeles. (AP Photo/Chris Pizzello)

Mynd: Ap Images - RÚV

Hildur vann Óskarinn fyrst Íslendinga

10.02.2020 - 03:50

Höfundar

Freyr Gígja Gunnarsson

Fréttastofa RÚV

Senda skilaboð

Hildur Guðnadóttir braut í nótt blað í sögu íslenskrar kvikmyndagerðar þegar hún varð fyrsti Íslendingurinn til að hljóta hin eftirsóttu Óskarsverðlaun. Þetta er hápunkturinn á lygilegri sigurgöngu Hildar en frá því í september hefur hún unnið Emmy-verðlaun, Golden Globe, Grammy, BAFTA og nú Óskarinn. Hún hvatti allar konur sem hefðu ólgandi tónlist í maganum til að hlusta á hjartað og láta í sér heyra því heimurinn þyrfti á þeim að halda.

Hildur þakkaði keppinautum sínum en fyrir fram hafði verið reiknað með að valið stæði milli Hildar og Thomas Newman sem gerði tónlistina við 1917. Þá þakkaði hún manninum sínum, syni og mömmu sem hún sagðist ekki vita hvar sætu í salnum en það mátti glöggt heyra fagnaðarlæti þeirra þegar hún tók við styttunni.

#Oscars Moment: Hildur Guðnadóttir (@hildurness) wins Best Original Score for @jokermovie. pic.twitter.com/uwrOuBszuD

— The Academy (@TheAcademy) February 10, 2020

Og það var ýmislegt sem benti til þess að þetta yrði niðurstaðan því í fyrsta skipti var stjórnandi hljómsveitarinnar sem lék undir kona og það voru bara konur sem afhentu verðlaunin. Þær áttu það reyndar allar sameiginlegt að hafa leikið þekktar hetjur í kvikmyndasögunni; Brie Larson er Captain Marvel, Gal Gadot Ofurkonan og Sigourney Weaver lék auðvitað Ripley í Alien-myndunum.

Hildur Gudnadóttir finished her #Oscars acceptance speech with a call-to-arms to creative women all over the world: "To the girls, to the women, to the mothers, to the daughters who hear the music bubbling within, please speak up" https://t.co/lEZhA2e5KR

— The Hollywood Reporter (@THR) February 10, 2020

Allir helstu spekingar höfðu spáð Hildi sigri en tónlist hennar leikur stórt hlutverk í kvikmyndinni Joker.

Bæði Todd Phillips, leikstjóri myndarinnar og aðalleikarinn Joaquin Phoenix hafa talað um það hversu mikilvæg tónlist Hildar var þegar sýna átti hvernig brjálæðið yfirtekur aðalpersónuna Arthur Fleck og breytir honum í Jókerinn. Hildur samdi stóran hluta hennar áður en myndin fór í tökur sem þykir einstakt.

epa08207855 Hildur Guonadottir reacts after winning the Oscar for Achievement in Music written for Motion Pictures (Original Score) during the 92nd annual Academy Awards ceremony at the Dolby Theatre in Hollywood, California, USA, 09 February 2020. The Oscars are presented for outstanding individual or collective efforts in filmmaking in 24 categories. EPA-EFE/ETIENNE LAURENT

Sigurganga Hildar hófst í september þegar hún hlaut Emmy-verðlaunin fyrir tónlistina við sjónvarpsþættina Chernobyl. Síðan hlaut hún Golden Globe-verðlaunin fyrir Jókerinn og svo Grammy fyrir Chernobyl. Hún stóð síðan uppi sem sigurvegari á bresku BAFTA-verðlaununum sem gaf til kynna að þetta yrði niðurstaðan.

Hildur er fyrsta konan til að vinna þessi verðlaun í 22 ár, sú síðasta sem gerði það var Anne Dudley fyrir Full Monty. Keppinautar hennar voru allir miklir reynsluboltar, Randy Newman hefur unnið tvenn Óskarsverðlaun eins og Alexander Desplat. Þá hefur John Wiliams verið tilnefndur til 52 Óskarsverðlauna og hlotið þau fimm sinnum. Helsti keppinautur Hildar var hins vegar Thomas Newman sem hefur fimmtán sinnum verið tilnefndur til verðlaunanna en aldrei unnið.

Hildur er jafnframt fyrsti Íslendingurinn til að hljóta þessi eftirsóttu verðlaun. Friðrik Þór Friðriksson, Björk Guðmundsdóttir og Sjón, Rúnar Rúnarsson og Þórir Snær Sigurjónsson og Jóhann Jóhannsson hafa öll verið tilnefnd en farið tómhent heim.