Athugið þessi frétt er meira en 12 mánaða gömul.

Hert samkomubann mun hafa mikil áhrif á samfélagið

Mynd með færslu
 Mynd: Beggi - RÚV
Þórólfur Guðnason, sóttvarnarlæknir, segir í minnisblaði sínu til heilbrigðisráðherra að nauðsynlegt sé að herða frekar á samkomubanninu sem sett var 15. mars til að koma í veg fyrir að svartasta spá yfirvalda rætist. Hert samkomubann muni hafa mikil áhrif á samfélagið en heilsufarsávinningur réttlæti þessar aðgerðir. Svartasta spáin gerir ráð fyrir að fjöldi þeirra sem eru með virkan COVID-19 sjúkdóm verði 1.200, 130 verði lagðir inn á sjúkrahús og 10 til 30 liggi á gjörgæslu.

Minnisblaðið var kynnt á fundi ríkisstjórnarinnar nú síðdegis.

Í því tekur Þórólfur fram að spálíkanið sé uppfært nánast daglega og spáin kunni því að breytast í samræmi við það. Spár gera ráð fyrir að toppi faraldursins verði náð fyrri hluta aprílmánaðar. 

568 hafa greinst með COVID-19. 95 ný smit hafa verið staðfest miðað við sömu tölur í gær. 546 eru í einangrun þar sem 22 er batnað. Alls eru 6.340 í sóttkví og 12 á sjúkrahúsi.

Í minnisblaði Þórólfs er segir jafnframt að líklega hafi einn látist af völdum COVID-19 sjúkdómsins hér á landi.  Það var ferðamaður frá Ástralíu sem lést á Heilbrigðisstofnun Norðurlands.  Eiginkona hans greindist einnig með kórónuveiruna og hefur verið í einangrun síðan. 

Þórólfur segir að smit á Íslandi hafi þegar haft áhrif á getu Landspítalans til að veita heilbrigðisþjónustu og sú staða kalli á frekari viðbrögð til að varna því að veiran breiðist hratt út. „Nauðsynlegt er að hægja á faraldrinum enn frekar til að auka líkur á því að heilbrigðiskerfið geti sinnt þeim sem veikjast af COVID19 ásamt því að geta sinnt annarri bráðaþjónustu,“ segir í minnisblaðinu.

Tillagan um hert samkomubann eigi að hægja enn frekar á útbreiðslu COVID-19 í þeim tilgangi að viðhalda starfsgetu heilbrigðiskerfisins. „Ef faraldurinn nær hraðri útbreiðslu eru líkur á að geta sjúkrahúsa til að sinna alvarlega veikum einstaklingum muni ekki verða fullnægjandi.“

Þórólfur segir jafnframt að fyrirmæli um hert samkomubann muni hafa mikil áhrif á samfélagið en líklegt verði að telja að heilsufarsávinningur sem af þeim hljótist réttlæti þau áhrif.

 

freyrgigja's picture
Freyr Gígja Gunnarsson
Fréttastofa RÚV