Heimildarmynd um Magnús Pálsson frumsýnd á jóladag

Mynd: Steinþór Birgisson / Á skjön

Heimildarmynd um Magnús Pálsson frumsýnd á jóladag

20.12.2019 - 13:28

Höfundar

Bergsteinn Sigurðsson

dagskrárgerðarmaður

Magnús Pálsson myndlistarmaður verður níutíu ára á jóladag. Þann dag verður ný heimildarmynd um þennan áhrifamikla listamann frumsýnd í Bíó paradís.

Myndin nefnist Á Skjön en leikstjóri hennar Steinþór Birgisson hefur unnið með Magnúsi undanfarinn aldarfjórðung. „Myndin er ofin saman úr nokkrum ólíkum þráðum. Efnið er allt tekið upp á síðustu sex eða sjö árum, stór hluti af myndinni hverfist í kringum gjörninga sem voru settir upp á Listahátíð í Reykjavík 2013. Það voru stór verk sem kröfðust mikils mannafla. Þetta var allt tekið upp og úr því fæddist mynd sem er tilraun til að koma Magnúsi og hans hugrenningum um lífið og tilveruna til fólks.“

Mynd: RÚV

Steinþór Birgisson.

Steinþór lýsir Magnúsi sem einstaklega hógværum manni en um leið sé í verkum hans „óskaplega sterk krafa um að líta á hlutina öðruvísi en þú ert vanur að gera, sjá aðra hlið á þeim. Það er það sem hann er sem listamaður fyrir mér og þannig hefur hann haft mikil áhrif á hvernig ég hugsa og fjölda annarra. Á sama tíma tekur hann sig svo lítið hátíðlega. Það er alltaf gaman í kringum hann.“

Rætt var við Steinþór í Menningunni. Horfa má á innslagið hér að ofan.