Hætt að aka í gegnum Selfoss

10.06.2019 - 18:43
Mynd: Jón Þór Víglundsson / RÚV
Það er of seint að bíða í sex ár eftir að hringvegurinn verði færður norður fyrir Selfoss, segir bæjarstjóri Árborgar. Tuttugu til þrjátíu þúsund bílum er núna ekið daglega yfir brúna yfir Ölfusá. Með nýjum vegi og brú er viðbúið að mun færri aki í gegnum Selfoss.

Nýr hringvegur á að liggja rétt norðaustan við Selfoss. Brúin yfir Ölfusá fer yfir hólma í ánni og þar verður mastur sem brúin hangir. Það verður 60-70 metra hátt eða næstum því jafnhátt og Hallgrímskirkjuturn.

Inni á Selfossi fer lítið fyrir rónni og kyrrðinni sem er við tilvonandi brúarstæði. Um miðjan dag er bíll við bíl á Austurvegi.

„Við vonumst til að ný brú sem er fullhönnuð að hafist verði handa við hana innan fjögurra ára. En til þess þarf auðvitað að finnast eitthvað út úr fjármögnun allra þessara samgönguframkvæmda sem þörf er á á Íslandi. Samkvæmt samgönguáætlun þá yrði ekki hafist handa fyrr en eftir sex ár. Miðað við þá gríðarlegu umferð sem hér er, 20.000 til 30.000 bílar á dag um brúna gömlu, þá er það bara eiginlega of seint,“ segir Gísli Halldór Halldórsson, bæjarstjóri Árborgar.

Mynd með færslu
 Mynd: Sigurður Þórisson - RÚV

Eftir að nýr hringvegur hefur verið lagður getur fólk ekið eftir honum í austurátt án þess að aka í gegnum Selfoss.

„En það sem við erum að binda vonir við er að við getum breytt Austurvegi í eins konar breiðstræti sem tengir þá saman nýju brúna austan við Selfoss við þennan nýja miðbæ sem er að rísa hérna í hjarta bæjarins,“ segir Gísli.

Hann vonast til þess að endurbætur á bænum laði ferðamenn að.

kristins's picture
Kristín Sigurðardóttir
Fréttastofa RÚV
Síðast:
Þessi þáttur er í hlaðvarpi