Athugið þessi frétt er meira en 9 ára gömul.

Hæstaréttardómur í ofbeldismáli vonbrigði

01.02.2013 - 12:28
Mynd með færslu
 Mynd:
Saksóknari segir það mikil vonbrigði fyrir ákæruvaldið að hæstaréttardómarar telji það ekki til kynferðisbrota að stinga fingrum upp í leggöng og endaþarm konu. Fjórir karlkyns dómarar komust að þeirri niðurstöðu, eini kvendómarinn skilaði séráliti og var ósammála körlunum.

Saksóknarinn segir brotið freklega gegn kynfrelsi fórnarlambsins og saksóknarinn segir að þetta sé hrein pynting af kynferðislegum toga.

Hæstaréttardómararnir Markús Sigurbjörnsson, Árni Kolbeinsson, Gunnlaugur Claessen og Ólafur Börkur Þorvaldsson telja að með þessu hafi átt að meiða brotaþola en háttsemin teljist ekki til samræðis eða annarra kynferðismaka.

Ingibjörg Benediktsdóttir bendir í séráliti sínu á að ákvæði í kynferðisbrotakafla hegningarlaganna hafi verið rýmkað, undir það falli nú svokölluð önnur kynferðismök sem séu meðal annars það að setja fingur eða hluti inn í leggöng eða endaþarm. Þau beri að leggja að jöfnu við samræði. Ingibjörg segir í áliti sínu að með þessu hafi konan verið beitt grófu kynferðislegu ofbeldi og brotið hafi verið freklega gegn kynfrelsi hennar. Háttsemin hafi verið afar niðurlægjandi og engu skipti hvort tilgangur ofbeldismannsins hafi verið einhver annar en að veita sjálfum sér kynferðislega fullnægju.

Undir þetta tekur Hulda Elsa Björgvinsdóttir, saksóknari hjá embætti Ríkissaksóknara. Hún segir að niðurstaða hæstaréttar, sem horfir á hugarheim sakbornings en ekki verknaðinn, sé afar slæm. Þetta hafi verið hrein pynting af kynferðislegum toga.

Hulda segir að með dóminum sé stigið skref afturábak þar sem horfið sé frá því að tryggja kynfrelsi brotaþola: „Niðurstaðan er náttúrulega sú að það verður þarna þynging og auðvitað er sami refsiramminn í þessum tveimur brotum, en þetta skiptir máli upp á mál sem koma upp seinna, af því að þetta er fordæmisskapandi dómur. Við teljum að þarna sé í raun og veru fráhvarf frá því sem ætlun löggjafans var, að tryggja kynfrelsi brotaþola og leggja áherslu á verknaðinn, ekki hvaða hvatir ligga að baki.“