Athugið þessi frétt er meira en 3 ára gömul.

Gyða Valtýsdóttir fær verðlaun Norðurlandaráðs

Vinnare av Nordiska rådets musikpris 2019, Gyða Valtýsdóttir Island
 Mynd: Norden

Gyða Valtýsdóttir fær verðlaun Norðurlandaráðs

29.10.2019 - 19:07

Höfundar

Gyða Valtýsdóttir fær tónlistarverðlaun Norðurlandaráðs. Tilkynnt var um verðlaunin á verðlaunahátíð Norðurlandaráðs í Stokkhólmi í Svíþjóð.

Gyða Valtýsdóttir var á meðal hinna 13 listamanna og hópa sem tilnefndir voru til tónlistarverðlauna Norðurlandaráðs 2019.

Í rökstuðningi dómnefndar segir meðal annars að Gyða Valtýsdóttir hafi ekki einskorðað sig við neina tiltekna tónlistarstefnu, þrátt fyrir að vera menntuð í sígildri tónlist. „Ung að árum var hún einn stofnmeðlima hinnar rómuðu tilraunakenndu rafsveitar múm. Síðan þá hefur hún verið áberandi sem fjölhæfur flytjandi í flokki þess íslenska tónlistarfólks sem hefur getið sér gott orð á erlendri grund.“

Mynd: SVT / SVT
Gyða Valtýsdóttir tekur á móti tónlistarverðlaunum Norðurlandaráðs í Stokkhólmi.

Gyða er menntuð í sellóleik en síðastliðin ár hefur hún bæði flutt frumsamda tónlist og átt í samstarfi við tónlistarfólk úr ýmsum áttum. Í rökstuðningi dómnefndar segir enn fremur að menntunin hafi nýst henni sem grunnur til að fara eigin leiðir. „Gyða hrífur áheyrendur sína með einstökum flutningi sem einkennist af áhrifaríkri tilfinningu fyrir mótun hendinga og fraseringu. Hún hefur mikla sérstöðu sem flytjandi og nærvera hennar á sviði er bæði heillandi og einstök – viðkvæm og óræð en jafnframt kraftmikil. Flutningur hennar er ákaflega persónulegur, samfelldur og framúrskarandi, hvort sem hún leikur á selló, syngur á sinn sérstæða hátt eða leikur á önnur hljóðfæri, og ávallt liggur frumleikinn til grundvallar.“

Gyða Valtýsdóttir vakti fyrst athygli með rafsveitinni múm upp úr síðustu aldamótum. Árið 2017 gaf hún út plötuna Epicycle, sem inniheldur verk tónskálda á borð við Schubert, Schumann og Messiaen, en einnig tilraunakenndari höfunda eins og Harry Partch og George Crumb. Árið 2018 sendi hún frá sér plötuna Evolution og fyrsta plata hennar með kvikmyndatónlist (við myndina Undir halastjörnu) kom út á síðasta ári.

Tónlistarverðlaunin voru afhent af verðlaunahafa ársins 2017, hljómsveitarstjóranum Susönnu Mälkki, við verðlaunaathöfn í beinni útsendingu frá tónleikahúsinu í Stokkhólmi á þriðjudagskvöld.

Annað hvert ár eru tónlistarverðlaunin veitt núlifandi tónskáldi og hitt árið, eins og í ár, eru þau veitt tónlistarhópi eða -flytjanda.

Upplýsingar um aðra verðlaunahafa kvöldsins má finna hér.