Guðni og Eliza í opinberri heimsókn í Nuuk

23.09.2019 - 13:00
Mynd með færslu
 Mynd: Forsetaembættið
Guðni Th. Jóhannesson, forseti Íslands, og frú Eliza Reid halda í formlega heimsókn til Nuuk í dag, 23. september, í boði Kim Kielsen, forsætisráðherra Grænlands. 

Í tilkynningu frá skrifstofu forseta segir að forsetahjónin byrji á því að skoða Þjóðminjasafn Grænlands og sækja að því loknu móttöku sem Þorbjörn Jónsson aðalræðismaður efnir til þeim til heiðurs. Þar verða meðal annars grænlenskir embættis- og stjórnmálamenn og fulltrúar fyrirtækja sem átt hafa í samstarfi við íslensk fyrirtæki, auk Íslendinga sem búsettir eru í Nuuk. 

Á morgun mun forseti eiga fund með Kielsen forsætisráð­herr­a. Þá munu forsetahjónin heimsækja Háskóla Grænlands og ræða þar við starfsmenn og nemendur. Einnig verður haldið í þjóðþingið Inatsisartut þar sem forseti á fund með Vivian Motzfeldt þingforseta. Guðni situr svo fund með landstjóra Dana, Mikaela Engell, og sitja forsetahjónin svo hátíðarkvöldverð í boði forsætisráðherrans í Hans Egede húsinu. 

Áður en heimsókninni lýkur á miðvikudaginn heimsækja forseta­hjónin Miðstöð loftslagsrannsókna í Nuuk, Kofoeds-skólann og Royal Arctic Line sjóflutningafyrirtækið. Einnig munu þau eiga einnig fund með borgarstjóranum í Nuuk, Charlotte Ludvigsen.  

Eliza mun einnig eiga fundi með Sara Olsvig, fv. ráðherra sem nú er verkefnisstjóri UNICEF, og með Aviâja Egede Lynge, umboðsmanni barna á Grænlandi. 

andriyv's picture
Andri Yrkill Valsson
Fréttastofa RÚV
Síðast:
Þessi þáttur er í hlaðvarpi