Athugið þessi frétt er meira en 3 ára gömul.

Grímseyingar áhyggjufullir

15.10.2019 - 19:30

Innlent · Byggðakvóti · Grímsey · Norðurland · Sjávarútvegur

Mynd: Birgir Þór Harðarson - RÚV

Íbúar í Grímsey hafa áhyggjur af stöðunni sem upp er kominn á eynni en allt hlutafé sjávarútvegsfyrirtækisins Sigurbjarnar ehf., hefur verið selt. Með sölunni fer nær helmingur þeirra aflaheimilda, sem útgerðarfyrirtæki í Grímsey ráða yfir, frá eyjunni. Kaupsamningurinn er gerður með fyrirvara um samþykki Samkeppniseftirlitsins.

Staðan viðkvæm

Skráður íbúafjöldi í Grímsey er um 60 en ætla má að um helmingurinn búi þar á veturna. Grímseyingar hafa tekið þátt í verkefninu brothættum byggðum frá sumrinu 2015 en ekki hefur tekist að snúa íbúaþróun í eyjunni við. Síðasta vetur var skólahald í eynni lagt niður en aðeins þrír nemendur stunduðu þá nám við Grímseyjarskóla.

Sigurbjörn ehf. hefur gert út þrjá báta og rekur fiskvinnslu í eynni þar sem um 9 manns starfa að jafnaði. Með sölunni hverfa aflaheimildir félagsins frá Grímsey. Gylfi Gunnarsson, eigandi Sigurbjarnar ehf., vildi ekki ræða við fréttastofu þegar eftir því var leitað en Grímseyingar sem fréttastofa ræddi við hafa áhyggjur af stöðunni.

Íbúar hafa áhyggjur

Sigurður Bjarnason, íbúi í Grímsey hefur áhyggjur af stöðu mála. „Já vissulega höfum við það, þetta er náttúrlega alltaf að minnka, kvótinn hér og það er nú svo sem ekki mikið annað að gera hér en sjómennska. Svo fækkar íbúunum hér. Það eru sjö manns farin héðan bara núna í haust. Þannig að þetta sígur allt í verri áttina, segir Sigurður.

Bæjarstjórn fylgist grannt með stöðunni

Halla Björk Reynisdóttir, forseti bæjarstjórnar Akureyrar segir bæjarstjórn fylgjast grannt með stöðunni. „Þetta er áhyggjuefni en hérna, í öllu felast einhver tækifæri og við gætum kannski verið að horfa upp á uppbyggingu atvinnulífs, svosem ferðamennsku. Hver veit.“