Mynd: AP
Athugið þessi frétt er meira en 1 ára gömul.
Gert að yfirgefa heimili sín vegna mikilla flóða
Íbúum í Bewdley í Worchester-skíri á Englandi hefur verið gert að yfirgefa heimili sín vegna mikilla flóða. Sökum úrhellisrigningar síðustu daga flæddi áin Severn yfir bakka sína í gærkvöld.
Enn eru hátt í hundrað flóðaviðvaranir í gildi víða í Bretlandi eftir að óveðurslægðin Dennis gekk yfir. Breska veðurstofan hefur gefið út sérstakar viðvaranir fyrir Shrewsburry og Ironbridge en þar eru flóðin sögð ógna mannslífum.
Úrkoman hefur haft veruleg áhrif á samgöngur, skólahald og atvinnustarfsemi í miðhéruðum Englands. Spáð er töluverðri úrkomu næstu daga og er því talið að ástandið eigi eftir að versna.
