Fyrirtækjum sagt að útvega sitt eigið varaafl

16.02.2020 - 19:16
Mynd: Kristinn Þeyr / RÚV
Atvinnulífið í Vestmannaeyjum er án varaafls. HS veitur hafa ráðlagt fyrirtækjum í bænum að tryggja það sjálf. Framkvæmdastjóri Löngu ehf. segir það óviðunandi. 

Óveðrið á föstudag hefur valdið rafmagnstruflunum víða á Vestfjörðum og Suðurlandi um helgina. Þar mega íbúar búast við áframhaldandi truflunum næstu daga og vikur.

Vestmannaeyjabær býr að sjö varaaflsvélum, sem bærinn treysti á í 36 stundir um helgina. Það dugði fyrir heimilin í bænum en ekki atvinnulífið. 

„Ef það koma einhverjar hamfarir þar sem við þurfum að treysta á varaaflið, eins og um hávetur á vertíð, þá eigum við ekki varaafl fyrir atvinnulífið,“ segir Ívar Atlason, tæknifræðingur hjá HS veitum. 
 
Á vertíð þarf 13 megavött af rafmagni. Varaaflsvélarnar framleiða fjögur megavött. Áður en óveðrið skall á voru fyrirtækin í bænum beðin um að keyran niður alla starfsemi eins og mögulegt væri.
 
„ Við hjá HS veitum höfum hvatt fyrirtækin að koma sér upp varaafli sjálf, þá erum við langt komin með að leysa þetta vandamál,“ segir Ívar.

Er það eðlilegt að fyrirtækin þurfi að leysa þetta sjálf? „Ja, nú er erfitt fyrir mig að svara því. Hver og einn verður aðeins að hugsa um sjálfan sig. Þó að það séu lög í landinu að það sé lögbundið hlutverk Landsnets að flytja rafmagnið þá getur allt gerst.“

„Okkur finnst þetta óásættanlegt,“ segir Hallgrímur Steinsson, framkvæmdastjóri Löngu ehf.  „Þeir eru með sérleyfi til að selja raforku í Vestmannaeyjum. Það samræmist ekki að þeir séu þá að hvetja aðra til að framleiða sína orku.“

Hallgrímur segir fyrirtækið hafa lent í því að rafmagn til þess hafi verið skert þrátt fyrir að fyrirtækið sé með samning um forgangsorku.
 
Fyrirtækið bauð Landsneti og Veitum að taka þátt í kostnaði við varaaflstöð fyrir atvinnulífið í bænum. Landsnet tók vel í það en ekki Veitur.

„Okkur fannst það mjög svekkjandi að menn skyldu ekki hafa skilning á því að það væri mikil verðmæti undir til dæmis loðnuvertíð,“ segir Hallgrímur. „Þá geta menn komist upp með að benda hvern á annan og þurfa ekki að hugsa í neinum lausnum eða taka þátt í því að leysa þennan vanda sem er raunverulega í Vestmannaeyjum.“

Hér má horfa á sjónvarpsfréttatíma kvöldsins. 

 

holmfridurdf's picture
Hólmfríður Dagný Friðjónsdóttir
Fréttastofa RÚV
Síðast:
Þessi þáttur er í hlaðvarpi