Athugið þessi frétt er meira en 1 ára gömul.

Franski herinn felldi vígamenn í Malí

21.12.2019 - 23:32
epa08025956 (FILE) - A military helicopter  carrying French President Emmanuel Macron (upper-L)  flies over Gao during a visit to France's Barkhane counter-terrorism operation in Africa's Sahel region, northern Mali, 19 May 2017 (reissued 26 November 2019). According to recent reports, 13 French soldiers died in helicopter crash during the Barkhane counter-terrorism operation against jihadists in Mali.  EPA-EFE/CHRISTOPHE PETIT TESSON / POOL
Franskar herþyrlur á flugi yfir Malí  Mynd: EPA-EFE - EPA POOL
33 hryðjuverkamenn voru felldir í aðgerðum franska hersins í Malí í dag. Emmanuel Macron greindi frá þessu á fundi með frönskum hermönnum í Vestur-Afríku. Frakkar og friðargæslusveit Sameinuðu þjóðanna hafa staðið vaktin í Malí undanfarin ár. Þrátt fyrir það hafa átökin sem hófust í landinu árið 2012 aukist og breiðst út til nágrannaríkjanna Búrkína Fasó og Níger. 

Hryðjuverkamennirnir voru felldir í aðgerð nokkurra herdeilda með aðstoð herþyrla í borginni Mopti í miðju Malí. Aðeins örfáar vikur eru síðan 13 franskir hermenn létu lífið í þyrluslysi þegar þeir voru að elta uppi vígamenn í norðurhluta Malí. 

Macron sagði aðgerðina sýna staðfestu og stuðning Frakka í Malí og nágrenni. Ummæli hans eru ef til vill svar við nýlegri gagnrýni á veru franskra hersveita og friðargæslusveita SÞ að sögn AFP fréttastofunnar. Þrátt fyrir þúsundir hermanna hafa árásir vígamanna farið vaxandi í landinu.

Von er á leiðtogum fimm ríkja af Sahel svæðinu til Frakklands 13. næsta mánaðar. Þar býður Macron til ráðstefnu þar sem línur verða lagðar um framhald baráttunnar gegn hryðjuverkasamtökum. 

Róbert Jóhannsson
Fréttastofa RÚV