Athugið þessi frétt er meira en 2 ára gömul.

Forseti Chile reynir að miðla málum

23.10.2019 - 04:36
epa07941799 Hundreds of protesters participate in a demonstration at the central Plaza Italia, in Santiago, Chile, 22 October 2019. A new curfew was decreed for the night in different cities of Chile and is the fourth consecutive in Santiago, Valparaiso and Concepcion (south) since the protests that left 15 people dead, including four foreigners from Colombia, Peru and Ecuador. Thousands of people in Chile returned to the streets on 22 October, for the fifth consecutive day, to protest against the Government amidst the states of emergency and the new curfews already decreed in several areas of the country. Unrest, sparked by a hike in metro fares, quickly morphed into a wider protest against social inequality.  EPA-EFE/ALBERTO VALDES
 Mynd: EPA-EFE - EFE
Forseti Chile lagði í gærkvöld til félagslegar umbætur til þess að mæta kröfum mótmælenda í landinu. 15 hafa látið lífið í mótmælum undanfarinna daga. Sebastian Pinera forseti hélt  fund með leiðtogum nokkurra stjórnarandstöðuflokka í gærkvöld. Þrír flokkar sendu ekki fulltrúa til fundarins, þar á meðal Sósíalistaflokkurinn, sem er stærsti stjórnarandstöðuflokkurinn á þingi Chile.

Meðal umbóta sem Pinera kynnti var 20 prósenta hækkun á lágmarkslífeyri, að ríkið standi straum af kostnaði við dýrar læknaaðgerðir, og að skattar á rafmagn verði frystir.

Mótmælendur komu áfram saman í höfuðborginni Santiago og víðar, og fóru mótmælin víðast hvar friðsamlega fram. Mótmælin hófust á föstudag eftir að stjórnvöld tilkynntu um hækkun fargjalda í neðanjarðarlestir. Mótmælin héldu áfram á laugardag, þrátt fyrir að Pinera tæki til baka fargjaldahækkunina, og urðu að allsherjarmótmælum gegn vaxandi bili á milli ríkra og fátækra í landinu. Pinera lýsti yfir neyðarástandi í Santiago og víðast hvar annars staðar í landinu. Síðustu fjóra daga hefur herinn lagt á útgöngubann frá átta að kvöldi til fimm að morgni.

Það kvað við annan tón frá Pinera á mánudag þegar hann óskaði eftir samstöðu allra stjórnmálaflokka um að finna lausn á þeim vandamálum sem íbúar Chile eiga við að etja. 

Ofbeldið sem fylgt hefur mótmælunum er eitthvað það versta frá einræðistíð Augusto Pinochet frá 1973 til 1990. Um 20 þúsund manna lið lögreglu- og hermanna var kallað út til að gæta öryggis almennra borgara. Meiri ró var þó yfir höfuðborginni í gær og í fyrradag en um helgina. Almenningssamgöngur láu þó enn að miklu leyti niðri, verslunarmiðstöðvar og fyrirtæki voru lokuð og um 50 skólar og tíu háskólar voru lokaðir í Santiago. Sjúkrahús og meðferðarstofnanir voru opnar.

Róbert Jóhannsson
Fréttastofa RÚV