Athugið þessi frétt er meira en 2 ára gömul.

Flokki hægri öfgamanna hafnað

23.05.2019 - 17:18
Mynd með færslu
 Mynd: RÚV
Í dag hafnaði framkvæmdastjórn Evrópuráðsþingsins að viðurkenna nýjan stjórnmálahóp hægri öfgamanna á þinginu. Andstaða gegn viðurkenningunni var leidd af Rósu Björk Brynj­ólfs­dóttur, þing­manni Vinstri grænna, og Þór­hildi Sunnu Ævars­dótt­ur, þing­flokks­for­manns Pírata.

Þetta kemur fram í sameiginlegri yfirlýsingu frá Rósu Björk og Þórhildi Sunnu  og eru þær afar ánægðar með niðurstöðuna að eigin sögn.

Umsókn stjórnmálahópsins hefur verið afar umdeild. Meðlimir hópsins koma úr röðum stjórnmálaflokka sem eru öfga-hægri flokkar, þjóðernissinnar og eru móti innflytjendum og hælisleitendum.

„Þetta sýnir að það er hægt að sporna við haturs-orðræðu og kynþáttahatri í stjórnmálum ef vilji er fyrir hendi. Þetta er frábær niðurstaða á tímum þegar vegið er stöðugt að mannréttindum,“ segir Rósa Björk.

„Við Rósa lögðum þrotlausa vinnu í það að standa vörð um gildi Evrópuráðsins í þessu máli og sú vinna hefur nú skilað þessum mikilvæga árangri í baráttunni við hatursorðræðu. Þetta eru þingmenn öfga-hægri flokka, eins og Alternativ für Deutschland og Lega Nord sem bera enga virðingu fyrir gildum Evrópuráðsins, við gátum ekki samþykkt viðurkenningu þeirra og nú er ljóst að framkvæmdastjórnin gerir það ekki heldur. Því ber að fagna,“ segir Þórhildur Sunna í yfirlýsingunni.

thorvardurp's picture
Þorvarður Pálsson
Fréttastofa RÚV