Athugið þessi frétt er meira en 2 ára gömul.

Fleiri sprungur undir malarlagi í Ketubjörgum

04.11.2019 - 15:19

Innlent · Náttúra · Ketubjörg · Norðurland · Skagi

Mynd: Björgvin Kolbeinsson / RÚV

„Miðað við það sem maður hefur séð af fólki á ferð þarna á brúninni þá var það ekkert notalegt að hugsa til þess,“ segir Ingólfur Sveinsson, bóndi á Lágmúla á Skaga, um það hvernig honum varð við þegar hann heyrði af því að bergið hefði fallið í fjöruna.

„Það er þakkarvert að það skyldi enginn vera þar þegar þetta skeður. Ég hef séð ferðamenn hlaða vörðu þarna suður á Fálkabakkanum. Hún var þar í viku, hálfan mánuð, en svo var hún horfin fram af.“

Gríðarmikil bergfylla sem skagað hefur út frá bjargbrúninni á Ketubjörgum á Skaga síðustu ár féll í sjó fram á laugardagsmorgun. Sprungan myndaðist vorið 2015 og stækkaði jafnt og þétt. Talið er að nokkur þúsund tonn af grjóti og jarðvegi hafi hrunið úr björgunum.

„Það var enginn áhorfandi þar,“ segir Ingólfur. „Þetta var bara sekúndubrot sem að sést þegar þetta fellur. Það er enginn nema jarðskjálftamælirinn sem segir til um það þegar það skeður þarna á laugardagsmorguninn.“

Fréttamenn RÚV voru á ferðinni á Skaga í morgun og mynduðu bjargið og það sem hrunið hafði í fjöruna.

Mynd: Björgvin Kolbeinsson / RÚV

Viðtal við Ingólf Sveinsson.

Spurður hvort enn sé hætta á ferðum segir Ingólfur að svo sé. „Það er ekki að sjá annað en að það hangi uppi enn. Þetta er náttúrlega óstöðugasta bergtegund sem fyrirfinnst á Íslandi, móbergið.“

Hann segir að ekki sé hægt að loka svæðinu. Þeir sem koma að skoða þurfa að hafa varann á, enda sjást sprungurnar ekki. „Það er þykkt malarlag ofan á berginu sem fela sprungurnar. Það er ekki að sjá annað héðan en að það sé sprungið og hangi uppi enn,“ segir Ingólfur.