Fjölmargir bjóða fram aðstoð á óvissutímum

Mynd með færslu
 Mynd: Kristinn Þeyr Magnússon - RÚV
Rauði krossinn hefur fundið fyrir miklum velvilja meðal fólks undanfarnar vikur og margir vilja gefa af sér í óvissuástandinu sem nú ríkir. Þetta kemur fram í tilkynningu frá Rauða krossinum. Fjölmargir hafa sett sig í samband við Rauða krossinn til þess að bjóða fram aðstoð og því hefur verið opnað skráningarform þar sem hægt er að skrá sig sem tímabundinn sjálfboðaliða sem Rauði krossinn getur leitað til ef á þarf að halda.

Í tilkynningunni segir að mörg sjálfboðaliðaverkefna Rauða krossins hafi fallið niður tímabundið eða breyst vegna ástandsins. Þannig hafi til dæmis heimsóknavinum verið breytt í símavini eins og mögulegt er, og opnum húsum fyrir innflytjendur verið lokað tímabundið. Reynt sé að veita aðstoð í gegnum síma eins og hægt er.

„Þar sem mikið annríki er hjá Rauða krossinum þá biðjum við fólk um að sýna því skilning að við höfum samband eftir þörfum en getum ekki sett okkur í samband við hvern og einn. Við leitum til fólks eftir því hvað verkefnin kalla á,“ er haft eftir Brynhildi Bolladóttur, upplýsingafulltrúi Rauða krossins.  „Það er hægt að skrá sig hjá okkur og við biðjum fólk sérstaklega um að taka fram ef það hefur reynslu, tungumálakunnáttu eða menntun sem getur nýst.“

Hér er hægt að skrá sig sem tímabundinn sjálfboðaliða hjá Rauða krossinum.

johann's picture
Jóhann Bjarni Kolbeinsson
Fréttastofa RÚV
Síðast:
Þessi þáttur er í hlaðvarpi