FB sektaður um 1,3 milljónir vegna mannlegra mistaka

10.03.2020 - 16:45
Mynd með færslu
 Mynd: RÚV
Persónuvernd hefur ákveðið að sekta Fjölbrautarskólann í Breiðholti um 1,3 milljónir króna vegna öryggisbrests sem varð hinn 15. ágúst í fyrra. Öryggisbresturinn varð með þeim hætti að kennari við skólann sendi tölvupóst á nýnema, það er nýja umsjónarnemendur sína og forráðamenn þeirra.

Hann lét fylgja með viðhengi sem hann taldi vera skjal sem innihéldi yfirlit yfir viðtalstíma. Fyrir mistök sendi kennarinn rangt viðhengi með tölvupóstinum en það viðhengi innihélt upplýsingar um viðtöl sem höfðu verið tekin við umsjónarnemendur frá fyrri önn og viðkvæmar persónuupplýsingar um þá. 

Persónuvernd taldi að öryggisbresturinn væri afleiðing af skorti á tæknilegum og skipulagslegum ráðstöfunum af hálfu FB til að tryggja öryggi persónuupplýsinga

Við ákvörðun sektarinnar var meðal annars litið til þess að umræddur öryggisbrestur fól í sér verulega skerðingu á einkalífsrétti viðkomandi nemenda, í ljósi eðlis þeirra persónuupplýsinga sem um ræddi. Alls fengu 57 manns persónuupplýsingar um nemendurna.

Á hinn bóginn var talið ljóst að ekki var um að ræða langvarandi brot heldur einstakt tilvik. Þá var talið ljóst að ekki væri um að ræða vinnslu í ólögmætum tilgangi heldur mannleg mistök. Einnig var það talið hafa vægi við sektarákvörðun að um var að ræða stofnun sem veitir almannaþjónustu.

 

Jón Hákon Halldórsson
Fréttastofa RÚV
Síðast:
Þessi þáttur er í hlaðvarpi