Athugið þessi frétt er meira en 2 ára gömul.

Fallist á endurupptöku dóms fyrir stolin málverk

04.02.2020 - 08:33
Mynd með færslu
 Mynd: Jón Hákon Halldórsson - RÚV
Endurupptökunefnd hefur fallist á beiðni karlmanns sem var sakfelldur fyrir að geyma þýfi í gámi í Danmörku. Annars vegar voru þetta átta stolin málverk og hins vegar Porsche sem tekinn hafði verið ófrjálsri hendi. Maðurinn var ekki viðstaddur þegar hann var dæmdur í sex mánaða fangelsi. Hann taldi að ekki hefði verið farið að lögum þegar ákæran á hendur honum var birt.

Maðurinn óskaði fyrst eftir endurupptöku í mars fyrir tveimur árum. Endurupptökunefnd hafnaði þá beiðni hans. Hann fór með málið fyrir Héraðsdóm Reykjavíkur sem felldi úrskurð endurupptökunefndar úr gildi.

Maðurinn óskaði í framhaldinu eftir því að mál hans yrði tekið upp að nýju. Beiðni hans um endurupptöku var byggð á því að ekki hefði verið farið að lögum þegar ákæran í málinu var birt.  Hún hefði verið birt lögreglumanni sem hefði verið staddur á heimili hans eingöngu í þeim tilgangi að taka við fyrirkalli og ákæru. 

Ríkissaksóknari lagðist gegn því að beiðni mannsins yrði samþykkt þar sem þessi galli hefði ekki áhrif á niðurstöðu dómsmálsins.

Endurupptökunefnd segir hins vegar að gallinn hafi falið í sér frávik frá þeirri grunnreglu að ekki megi dæma menn til refsingar nema þeim hafi verið gefinn kostur á að halda uppi vörnum. 

Þar sem ekki hafi verið farið að lögum þegar ákæran var birt hafi ekki verið skilyrði til þess að leggja dóm á málið að manninum fjarstöddum.

freyrgigja's picture
Freyr Gígja Gunnarsson
Fréttastofa RÚV