Mynd:
Athugið þessi frétt er meira en 9 ára gömul.
Fá samviskubit yfir því að borða sætindi
Um 41 prósent kvenna, sem tóku þátt í rannsókn Landlæknisembættisins um heilsu og líðan Íslendinga, segjast fá samviskubit þegar þær borða sætindi. Næstum helmingi færri karla fá slíkt samviskubit. Helmingi fleiri konur segjast ekki drekka sykrað gos en karlar.
Framkvæmdaskýrsla Landslæknis um heilsu og líðan Íslendinga árið 2012 varpar nokkuð forvitnilegu ljósi á matarvenjur Íslendinga og ekki síst hversu ólík viðhorf kynin hafa til matar.
Í skýrslunni kemur meðal annars fram að 13 prósent þeirra karla sem tóku þátt í könnuninni borða skyndibita tvisvar til þrisvar í viku en aðeins 5,8 prósent kvenna. Munurinn er einnig greinilegur þegar spurt var um sykraða gosdrykki - rúmlega 17 prósent karla sögðust aldrei drekka slíka drykki en 34 prósent kvenna.
Íslendingar eru nokkuð duglegir að fá sér morgunmat sem almennt er talin mikilvægasta máltíð dagsins - 74 prósent karla sem tóku þátt fengu sér morgunmat á hverjum degi, 84 prósent kvenna.
Afstaða kynjanna til þess hversu sátt þau eru með eigin matarvenjur eru nokkuð svipuð - 58 prósent karlmanna eru mjög eða nokkuð sáttir við sínar matarvenjur, 54 prósent kvenna.
72 prósent karla segjast reyna borða hollan mat en 87 prósent kvenna.
Í skýrslunni var einnig spurt um viðhorf fólks til eigin líkamsþyngdar. 38 prósent kvenna eru mjög eða nokkuð ánægðar með sína líkamsþyngd - 48 prósent karla. 45 prósent kvenna eru frekar eða mjög ósáttar með eigin líkamsþyngd, tæplega þriðjungur karla.
Í skýrslunni var einnig spurt hvort þátttakendur hefðu reynt að létta sig eða þyngja síðastliðna tólf mánuði. Tæplega 5 prósent karla sögðust vera að reyna að þyngja sig, aðeins 1 prósent kvenna. 28 prósent karla sögðust vera að reyna létta sig, 41 prósent kvenna.
