Athugið þessi frétt er meira en mánaðargömul.

Er hægt að gera límtré úr íslensku timbri?

05.03.2019 - 14:00
Mynd:  / 
Þessar vikurnar er í gangi spennandi rannsókn þar sem aðalþátttakendurnir eru Skógræktin í Þjórsárdal, Límtré/Vírnet á Flúðum og Nýsköpunarmiðstöð Íslands. Rannsóknin gengur út á að komast að því hvort hægt sé að nota íslenskt timbur í límtré en hingað til hefur verið notað innflutt hráefni.

Límtré er eins og nafnið gefur til kynna timbur sem er límt saman og til dæmis notað sem burðarbitar. „Þetta er mjög svo spennandi. Það er frábært að nú hafi verið lagt af stað í þessa vegferð. Loksins segja margir, að vinna alvöru timbur úr trjánum. Þetta sé ekki bara fellt niður, kurlað og brennt. Að við séum núna farin að hugsa verulega til framtíðar,“ segir Trausti Jóhannsson skógarvörður sem er mjög bjartsýnn á að þetta gangi vel. 

„Rauði þráðurinn í þessu verkefni er umhverfismál,“ segir Logi Unnarson Jónsson ráðgjafi hjá Límtré/Vírneti. „Við gerum okkur alveg grein fyrir mikilvægi þessa verkefnis. Núna á t.d. að fara að stórauka skógrækt í landinu. Það gefur augaleið að það er mikill hagur í því að geta notað íslenskt timbur. Að sleppa við þungaflutninga frá Evrópu og bara byggja upp hér blómlega timburiðnað.“

Gerðar verða styrktarprófanir á íslenska límtréinu hjá Nýsköpunarmiðstöð og búist er við fyrstu niðurstöðum með vorinu. 

 

eddasif's picture
Edda Sif Pálsdóttir