Athugið þessi frétt er meira en 2 ára gömul.

Eldum rétt hafnaði sáttatilboði Eflingar

06.07.2019 - 10:29
Mynd með færslu
 Mynd: RÚV
Eldum rétt hafnaði í gær sáttatilboði verkalýðsfélagsins Eflingar í annað sinn. Að sögn félagsins neitaði fyrirtækið að gangast við lögbundinni ábyrgð sem notendafyrirtæki í máli fjögurra starfsmanna sem Eldum rétt leigði frá starfsmannaleigunni Menn í vinnu.

Þetta kemur fram í tilkynningu frá Eflingu.

Félagið segir mennina hafa verið látna sæta þvingun, vanvirðandi meðferð og brotum á ýmsum réttinda í samræmi við kjarasamninga.

Efling segir kröfuna á hendur Eldum rétt bygga á lögum um keðjuábyrgð en hún var unnin af lögmannsstofunni Rétti fyrir atbeina Eflingar og birt fyrirtækinu 17. apríl.

Fjögur notendafyrirtæki fengu slíka kröfu og féllust þrjú þeirra á hana án andmæla en Eldum rétt hafnaði henni og birti Efling þá fyrirtækinu stefnu. Kröfur og stefnan byggja á gagnaöflun kjaramálasviðs félagsins og lögmannsstofunnar, með umboði og þátttöku starfsmannanna samkvæmt tilkynningunni.

Funduðu í gær

Fulltrúar verkalýðsfélagsins og fyrirtækisins funduðu í gær og þar var sáttatilboði Eflingar hafnað af Kristófer Júlíus Leifssyni framkvæmdastjóra Eldum rétt.

„Afstaða fyrirtækisins er Eflingu vonbrigði, en hún er sama marki brennt og ummæli Kristófers í fjölmiðlum, þar sem höfð eru mörg orð um ábyrgð annarra en eigin ábyrgð hafnað“, segir í tilkynningu Eflingar.

„Nú er stór samfélagsleg umræða í gangi um meðferð á erlendu verkafólki og ábyrgð þeirra sem nýta sér hana. Það eru mjög mikil vonbrigði að Eldum rétt taki þennan pól í hæðina,“ segir Sólveig Anna Jónsdóttir, formaður Eflingar.

„Við höfum ný lög sem eiga að bæta þá takmörkuðu vernd sem innflutt vinnuafl nýtur, lög um keðjuábyrgð, en Eldum rétt notar þetta fyrsta tækifæri til að sverja þá ábyrgð af sér.“

„Það er með ólíkindum að Kristófer segi út um annað munnvikið hversu leiðinlegt honum þyki þetta og að hann ætli að axla ábyrgð, en út um hitt að sú ábyrgð sé nákvæmlega engin,“ segir Sólveig Anna.

„Hann hefur haft frá miðjum apríl til að gera hreint fyrir sínum dyrum, en hefur ekki gefið okkur nein gögn sem útskýra hvers vegna hann ætti að vera undanskilinn ábyrgð.“

Segir ásetning að baki brotum Eldum rétt

Viðar Þorsteinsson framkvæmdastjóri Eflingar segir það athyglisvert hversu mikill ásetningur virðist búa að baki viðbrögðum Eldum rétt. „Það blasir við að Eldum rétt tekur mjög einarða afstöðu með rétti atvinnurekenda til að misnota og svíkja starfsfólk, og tekur virkan þátt í þeim leik að hver aðilinn bendi á hinn. Allar smugur eru nýttar til að skjóta sér undan ábyrgð,“ segir Viðar.

„Það virðist auk þess standa mjög í fyrirtækinu að það geti kostað eitthvað að mæta afleiðingum gjörða sinna og rétta hlut mannanna sem það misnotaði,“ segir Viðar, en hagnaður fyrirtækisins árin 2017 og 2016 var samanlagt tæpar 160 milljónir. Sáttatilboð Eflingar hefði í heild kostað fyrirtækið rúmar 4 milljónir.

Ekki náðist í Kristófer Júlíus Leifsson framkvæmdastjóra Eldum rétt við vinnslu fréttarinnar.