Athugið þessi frétt er meira en mánaðargömul.

Ekki kafað í Núpá vegna hættu á krapaflóði

13.12.2019 - 10:47
Björgunarsveitir leita í Núpá
 Mynd: lögreglan á norðurlandi eystr - Lögreglan á norðurlandi eystr
Leit að pilti sem féll í Núpá í Sölvadal í Eyjafirði á miðvikudagskvöld verður haldið áfram af fullum krafti í dag með úthvíldum leitarmönnum. Um 200 leitarmenn og á þriðja tug tækja verða við leit, að því er fram kemur á Facebooksíðu lögreglunnar á Norðurlandi eystra.

Þar segir að áhersla verði lögð á að leita frá slysstað og niður að Stekkjaflötum. Leitað verði á þrettán leitarsvæðum. Þyrla Landhelgisgæslunnar og drónar frá sérsveit ríkislögreglustjóra og björgunarsveitum verða notuð við leitina. 

Kafarar hafa enn ekki getað kafað í ánni en tóku þátt í sérhæfðri leit í gær. Ekki er fyrirhugað að þeir kafi í dag vegna  mikillar hættu á krapaflóði.

Mikill kuldi er nú á leitarsvæðinu. Veðurspá er hagstæð fyrir daginn en leitarskilyrði eru þó afar erfið. Leitað verður fram á kvöld. 

 

Uppfært klukkan 11:42:  TF-LIF, þyrla Landhelgisgæslunnar, var nú á tólfta tímanum send til til leitar í Sölvadal. Fjögurra manna áhöfn er um borð sem og björgunarsveitarmaður á vegum Slysavarnafélagsins Landsbjargar. Áhöfn þyrlunnar kannar sömuleiðis aðstæður á svæðinu úr lofti. Þetta kemur fram í fréttatilkynningu frá Landhelgisgæslunni.