Nú eru tuttugu ár síðan og Watson verður þrítug á næsta ári. Hún hefur ekki setið með hendur í skauti síðan Hogwarts-göngunni lauk, fór í háskóla, hefur verið virkur talsmaður kvenréttinda og lék Fríðu í endurgerð Disney á Fríðu og Dýrinu svo eitthvað sé nefnt.

Hún fer um víðan völl í viðtalinu og ræðir allt frá samfélagsmiðlum til heimssögunnar. Aðspurð um hlutverk sitt sem aðgerðasinna segist Watson alltaf hafa verið svona. Hún hefur verið ötull talsmaður femínisma og vann meðal annars með Sameinuðu þjóðunum að átakinu HeForShe sem hófst í september 2014.  

„Án þessa hluta af mér er allt annað sem ég geri merkingarlaust. Mér líður illa að vera að taka pláss án þess að tala um þessa hluti sem skipta máli.“

Watson leikur Meg, eina af March-systrunum, í væntanlegri kvikmynd Gretu Gerwig, Little Women, sem byggð er á skáldsögunni víðfrægu eftir Louisu May Alcott. Ásamt Watson skartar myndin leikkonum á borð við Saoirse Ronan, Lauru Dern og Meryl Streep.  

Hún segir gerð myndarinnar hafi opnað huga sinn enn frekar og gert það augljóst fyrir sér að það sé ekki ein leið til að vera femínisti. Leið Meg til að vera femínisti sé til dæmis að taka sjálf þá ákvörðun að vera heimavinnandi móðir og eiginkona. „Þó svo að draumar hennar séu aðrir en systur hennar þá þýðir það ekki að þeir séu ekki mikilvægir.“

Að lokum kemur Watson inn á það að hún sé að verða þrítug. „Einu sinni hugsaði ég af hverju allir gerðu svona mikið mál úr því að verða þrítugir. Svo varð ég tuttugu og níu ára og guð minn góður, ég er svo stressuð og kvíðin.“ Þetta rekur hún til pressunnar sem samfélagið setur á konur á þessum aldri um að vera búnar að koma sér upp heimili, eiga eiginmann og helst barn. Þá hafi hún aldrei trúað því að hún gæti verið hamingjusöm einhleyp en hún sé það nú samt, þótt hún lifi engu skírlífi.