Daði Freyr tók við verðlaunagripnum úr höndum Hatara sem sigruðu í fyrra. „Ég er bara góður. Við erum að fara í Eurovision!“ sagði hann þegar hann tók við verðlaununum. Það voru fimm lög sem hófu keppni í Laugardalshöllinni, Ísold og Helga, Daði og Gagnamagnið, Nína, Íva og Dimma.
Eftir fyrstu kosningu voru það Daði Freyr og Dimma stigahæst og fóru því í úrslitaeinvígið og aðra símakosningu, en héldu þeim atkvæðum sem þau fengu í fyrri kosningunni frá dómnefnd og símakosningu. Það var svo Think About Things með Daða Frey og Gagnmagninu sem stóð upp sem sigurvegari kvöldsins í lok keppni. Þetta er í annað skipti sem Daði Freyr tekur þátt í Söngvakeppninni en hann lenti í öðru sæti með lagið Hvað með það árið 2017.
