Mynd: Skjáskot
Athugið þessi frétt er meira en mánaðargömul.
Brunasárin drógu kóalabjörninn Lewis til dauða
Kóalabjörninn Lewis, sem komst í heimsfréttirnar þegar honum var bjargað úr skógareldum í Ástralíu, er dáinn. Hann brann illa í eldunum og sárin drógu hann til dauða. Dýralæknar svæfðu hann þegar ljóst var að brunasárin væru ekki að gróa.
Myndskeiði af því þegar kóalabirninum er bjargað hefur verið dreift víða á vefnum síðustu viku. Toni Doherty hljóp inn í brennandi skóginn til þess að bjarga Lewis sem var kominn í ógöngur. Doherty reyndi svo að kæla brunasárin með vatni. Hann fékk svo aðhlynningu á dýraspítala en hann var illa brunninn eftir hrakfarirnar.
„Okkar helsta markmið er velferð dýrsins, svo það var þess vegna sem ákvörðunin var tekin,“ segir í tilkynningu frá Port Macquarie Koala spítalanum þar sem Lewis var meðhöndlaður. Breska ríkisútvarpið greinir frá þessu á vefnum.
Hundruð kóalabjarna hafa drepist í gróðureldunum sem geisa í Ástralíu. Hæsta viðbúnaðarstigi hefur verið lýst yfir í suðurhluta landsins. Sex manns hafa látist og meira en 500 heimili hafa brunnið í skógareldunum sem geisað hafa í Ástralíu síðan í september.
Mynd: AP / AP
Frétt RÚV 20. nóvember 2019.
