Athugið þessi frétt er meira en 2 ára gömul.

British Airways hættir flugi til Kaíró

20.07.2019 - 22:07
Mynd með færslu
 Mynd: CC0 - Pixabay
Breska flugfélagið British Airways hefur ákveðið að hætta að fljúga til Kaíró, höfuðborgar Egyptalands, í sjö daga af varúðarástæðum eftir öryggisúttekt. Fyrirtækið segir að ekki verði flogið þangað sem öryggi er talið ábótavant.

Bresk yfirvöld sendu frá sér tilkynningu í gær þar sem varað var við ferðum til Egyptalands vegna aukinnar hættu á hryðjuverkaárásum gegn flugvélum. Árið 2015 sprengdu hryðjuverkamenn rússneska farþegaþotu sem flaug frá hinum vinsæla ferðamannastað Sharm el-Sheikh við Rauðahaf.

Farþegar á Heathrow-flugvelli í Lundúnum sem voru að fara um borð í flug BA til Kaíró í dag fengu tilkynningu um að fluginu hefði verið aflýst og ekki yrði flogið þangað aftur í viku. 

Í yfirlýsingu frá flugfélaginu segir að stöðugt sé fylgst með öryggi á áfangastöðum þess og ákveðið hafi verið að hætta flugi til Kaíró í viku á meðan frekari úttekt á stöðunni fer fram. Ekki hefur verið greint frá því hvers vegna var gripið til þessara aðgerða.

Þýska flugfélagið Lufthansa aflýsti flugum til borgarinnar í dag en flogið verður þangað á morgun samkvæmt talsmanni þess.

thorvardurp's picture
Þorvarður Pálsson
Fréttastofa RÚV