Bræðratengsl ekki nóg í máli systkinanna í Sjólaskipum

Finnur Vilhjálmsson, starfsmaður RNA, greinir frá skýrslu um einkavæðingu Búnaðarbankans.
 Mynd: RÚV
Dómari við Héraðsdóm Reykjavíkur hafnaði í morgun kröfu systkinanna, sem oftast eru kennd við Sjólaskip, um að skattsvikamálum þeirra yrði vísað frá. Systkinin töldu að hægt væri með réttu að draga óhlutdrægni saksóknarans í málinu í efa á grundvelli tengsla hans við blaðamann. Saksóknarinn, Finnur Þór Vilhjálmsson, er bróðir blaðamannsins Inga Freys Vilhjálmssonar, sem hefur skrifað nokkrar greinar um málið og fannst systkinunum á sig hallað í þeim skrifum.

Dómarinn taldi að það þyrfti eitthvað meira að koma til en að Finnur og Ingi Freyr væru bræður. Bræðratengslin ein og sér leiddu ekki til þess að hægt væri með réttu að draga óhlutdrægni Finns Þórs í efa. 

Í október síðastliðnum hætti embætti ríkissaksóknara rannsókn á meintum upplýsingaleka frá héraðssaksóknara í fjölmiðla í tenglum við mál systkinanna. Þau töldu að áðurnefndur Ingi Freyr hefði fengið trúnaðarupplýsingar um málið frá héraðssaksóknara.

Embætti héraðssaksóknara gaf alls út fimm ákærur í málum tengdum fjölskyldunni. Systkinin, tvær systur og tveir bræður, eru ákærð í sitthvoru lagi auk þess sem bræðurnir eru ákærðir í einu málinu saman. Alls hljóða meintar vanframtaldar tekjur þeirra og félaga upp á nærri 4,4 milljarða og vangoldnir skattar einum milljarði. 

Stærsta einstaka brotið snýr að félögunum Kenora Shipping, Seadove Shipping og Fishing Company Beta. Þau voru öll skráð á Kýpur en stunduðu fiskveiðar við Namibíu. Bræðurnir Haraldur Reynir og Guðmundur Steinar Jónssynir eru ákærðir fyrir að hafa ekki talið fram tekjur, gjöld og önnur atriði sem gátu haft áhrif á skattlagningu félaganna.

Vantaldar tekjur voru rúmir þrír milljarðar árin 2005 og 2006 samkvæmt ákærunni og því ekki greiddir af þeim skattar upp á rúmar 800 milljónir króna. Þeir voru daglegir stjórnendur félaganna og endanlegir eigendur að 27,5 prósenta hlut hvor.

Systkinin eru líka ákærð hvert um sig fyrir vanframtaldar tekjur. Haraldur er ákærður fyrir að koma sér hjá greiðslu 71 milljónar króna í skatta og Guðmundur Steinar fyrir 66 milljóna króna undanskot. Systur þeirra eru einnig ákærðar, Berglindi Björk Jónsdóttur er gefið að sök að standa ekki skil á 40 milljóna króna skattgreiðslum og Ragnheiður Jóna er ákærð fyrir fimmtán milljóna króna skattsvik.

Brotin snúa að því að telja ekki fram greiðslur frá fyrirtækjum, viðskipti með hlutdeildarskírteini í sjóðum Kaupþings og gengishagnað.

 

 

freyrgigja's picture
Freyr Gígja Gunnarsson
Fréttastofa RÚV
Síðast:
Þessi þáttur er í hlaðvarpi