Bernie Sanders og Joe Biden. Mynd: EPA-EFE - EPA
Athugið þessi frétt er meira en mánaðargömul.
Biden lýstur sigurvegari í þremur ríkjum af sex
Gott gengi fyrrverandi varaforsetans Joe Biden í forkjöri Demókrataflokksins fyrir forsetakosningarnar í haust virðist ætla að halda áfram. Kosið var í sex ríkjum í gær og hefur Biden þegar verið lýstur sigurvegari í þremur þeirra. Meðal þeirra er Michigan, sem er fjölmennast ríkjanna þar sem kosið var í gær.
Bernie Sanders vann öruggan sigur gegn Hillary Clinton í Michigan fyrir fjórum árum. Úrslitin í gær eru því nokkuð áfall fyrir framboð hans, eftir nokkuð öfluga kosningu í fyrstu ríkjunum. Biden hefur hins vegar vaxið ásmegin eftir góðan sigur í Suður-Karólínu. Í framhaldinu náði hann góðum árangri á ofur-þriðjudeginum í síðustu viku. Þeir frambjóðendur sem síðan hafa helst úr lestinni hafa svo flestir lýst yfir stuðningi við Biden.
Auk Michigan er búið að lýsa yfir sigri Bidens í Missouri og Montana. Enn hafa ekki borist tölur frá Norður-Dakóta, Idaho og Washingtonríki.
