Athugið þessi frétt er meira en 3 ára gömul.

Áströlsk hjón stefna Mountaineers of Iceland

23.01.2019 - 21:24
Mynd með færslu
 Mynd: RÚV
Áströlsk hjón sem týndust í sjö tíma í vélsleðaferð við Langjökul fyrir tveimur árum hafa stefnt ferðaþjónustufyrirtækinu. Þau krefjast miskabóta og segja atvikið hafa haft mikil sálræn áhrif á þau. 

Hjónin David og Gail Wilson frá Ástralíu týndust í sjö tíma í vélsleðaferð við Langjökul á vegum fyrirtækisins Mountaineers of Iceland. Í hópnum voru 11 sleðar og voru hjónin öftust í röðinni. Fljótt fór veður að versna og hafði Veðurstofan gefið út stormviðvörun. Vélsleði hjónanna stöðvaðist og urðu þau viðskila við hópinn. 180 björgunarsveitarmenn ásamt starfsmönnum fyrirtækisins leituðu þeirra þar til þau fundust um sjö tímum síðar, heil á húfi. 

Nú hafa hjónin stefnt fyrirtækinu og krefjast fjögurra milljóna króna bóta vegna líkamlegs og andlegs miska. Þau hafi verið hrædd um líf sitt og ákveðið að grafa sig í fönn fyrir nóttina. Svo kalt hafi verið að augnlinsur Davids hafi frosið fastar og þau bæði hafi verið kalin á fingrum og tám.

Fyrirtækið hafnar ásökunum hjónanna. Í greinargerð fyrirtækisins segir að óveðrið hafi skollið á þegar ferðin hafi verið rúmlega hálfnuð. Starfsmenn hafi fylgt öllum öryggisreglum enda hafi allir í fyrirtækinu nýlega farið á öryggisnámskeið. Hjónin hafi hins vegar gert grundvallarmistök með því að færa sleðann frá staðnum þar sem þau urðu viðskila. Með þessu hafi þau torveldað leit. Þau hafi ekki þegið áfallahjálp eða læknisaðstoð eftir að þau fundust og krefst fyrirtækið sýknu. 

Aðalmeðferð fer fram í næstu viku.