Athugið þessi frétt er meira en 2 ára gömul.

Ástin spyr hvorki um stétt né stöðu

Mynd með færslu
 Mynd: Dean Cemball - Sólveig Matthildur

Ástin spyr hvorki um stétt né stöðu

11.07.2019 - 13:07

Höfundar

Önnur sólóplata Sólveigar Matthildar, sem er m.a. meðlimur í Kælunni miklu, ber titilinn Constantly in Love. Arnar Eggert Thoroddsen rýnir í verkið, sem er plata vikunnar á Rás 2.

Það er búið að vera dásamlegt að fylgjast með Kælunni miklu og sigrum hennar, en þær stöllur hafa haft mikið umleikis undanfarin misseri. Þær eru meira að segja farnar að gægjast aðeins upp úr moldinni, en síðasta plata, Nótt eftir nótt, vakti verðskuldaða athygli á þeim. Þar taka þær sitt gotaskotna popp upp á næsta stig, lög og flutningur er allur straumlínulagaðri án þess að einhverju biti eða köntum sé fórnað. Frábær hljómsveit og spennandi að sjá hverju þær snara upp næst.

Erfitt

Sólveig Matthildur, hljómborðsleikari og bakraddasöngkona, á greinilega erfitt með að vera kyrr, því að hún keyrir sólóferil samhliða. Fyrsta platan hennar undir eigin nafni kom út í desember 2016 og ber hinn kynngimagnaða titil Unexplained Miseries & the Acceptance of Sorrow. Platan lúrði í netheimum lengi vel, svo gott sem óáreitt. Í ágúst 2017 kom platan hins vegar út á efnislegu formi og í framhaldinu fór Sólveig að spila efni sitt á tónleikum, hérlendis og víðs vegar um Evrópu líka (og hún hefur og verið að spila í Ameríku).

Þessi fyrsta sólóplata Sólveigar inniheldur lög bundin í „endurtekningarsamar, sveimbundnar stemmur, líkt og um kvikmyndatónlist sé að ræða,“ eins og ég sagði í skrifum á sínum tíma um hana. „Söngrödd Sólveigar tónar yfir, stundum róleg og höfug, stundum æst og knýjandi … Tónlistin er lagbundin; þykkar og djúpar hljómborðsnótur tifa áfram ofan á draugalegum hljóðmottum og tónlistin er seiðandi, dregur mann inn...“

Hnitmiðuð

Nýja platan er hnitmiðaðri, og á einhvern hátt má merkja sömu þróun og hjá Kælunni miklu. Hlutirnir eru einfaldlega orðnir þéttari og úthugsaðri, sem kemur eðlilega með reynslu og atfylgi. Sólveig vinnur ennþá með gotnesku fagurfræðina og skírskotanir í þá tónlist og þann stíl eru sterkar. Sjá t.d. umslagið, sem er frábært, og minnir á plötur úr viðlíka geira sem komu út um miðbik níunda áratugarins (undir merkjum Mute og 4AD t.d.). Kinnat Sóley og Dean Kemball vinna með Sólveigu að listrænu hönnuninni. Sólveig vinnur mjög þétt með hádramatísk, gotnesk temu, en hún nær listavel að forðast það að vera kjánaleg eða tilgerðarleg. Vegna þess að hún er heiðarleg. Constantly in Love fjallar enda um ofurviðkvæmni, eins og ég les það, okkur sem erum óvenjunæm fyrir umhverfinu, finnst allt frábært og æðislegt en sögulega séð er slíku fólki refsað af normalíserandi samfélagsöflum. Maður á að skína, frá fyrsta hanagali, en það er ekki létt verk. Megi Sólveig starfa áfram lengi enn, því að hún er með hæfileikana og eljuna, ó já.

Tengdar fréttir

Popptónlist

Sólveig Matthildur - Constantly in Love

Tónlist

Kælan mikla meðal innipúka ársins

Popptónlist

Kælan mikla - Nótt eftir nótt