Andrés Ingi segir sig úr þingflokki Vinstri grænna

27.11.2019 - 14:53
Mynd með færslu
 Mynd: RÚV
Andrés Ingi Jónsson hefur sagt sig úr þingflokki Vinstri grænna og hyggst starfa sem óháður þingmaður út kjörtímabilið. Þetta herma heimildir fréttastofu.

Andrés Ingi Jónsson og Rósa Björk Brynjólfsdóttir hafa verið í þingflokki Vinstri grænna en hafa þó ekki stutt stjórnarsáttmála VG, Framsóknarflokksins og Sjálfstæðisflokksins. Ekki náðist í Rósu Björk við vinnslu fréttarinnar.

Eftir að Andrés hefur sagt sig úr þingflokknum hefur ríkisstjórnin fimm manna meirihluta, 34 þingmenn gegn 29 þingmönnum stjórnarandstöðu.

Í tilkynningu frá þingflokki Vinstri grænna sem barst laust eftir klukkan 15 í dag þakkar flokkurinn Andrési Inga samstarfið undanfarin ár. Hann hafi upplýst þingflokkinn í dag um ákvörðun sína.

Andrés Ingi sendi frá sér tilkynningu upp úr klukkan þrjú. Hér að neðan má lesa hana:

„Um þessar mundir eru tvö ár síðan flokksráð Vinstri grænna samþykkti að mynda ríkisstjórn með Sjálfstæðisflokki og Framsókn. Sú ákvörðun var nógu umdeild til að fjöldi félaga sagði skilið við hreyfinguna. Þrátt fyrir að ég hafi ekki stutt ríkisstjórnina á flokksráðsfundi ákvað ég að starfa áfram innan þingflokks VG – ekki síst til að styðja hina ágætu ráðherra Vinstri grænna til góðra verka.

Eins og við var að búast hefur verið nokkur áskorun að takast á við samskipti og samstarf í þingflokknum eftir þann ágreining sem stjórnarsamstarfið skapaði. Þó tel ég að við höfum öll lagt okkur fram um að vinna sem best saman.

Það hafa á þessu tíma safnast upp dæmi sem mér þykja til marks um það sem ég óttaðist í upphafi: að Vinstri græn ættu sífellt erfiðar með að veita samstarfsflokkunum mótspyrnu og stjórnarsamstarfið færðist enn fjær því sem flokkurinn ætti að standa fyrir. Vissulega höfum við náð árangri en oft hafa málamiðlanir fallið fjarri okkar hugsjónum, eins og birtist til að mynda í stjórnarfrumvarpi um útlendinga á liðnu vori. Aðkallandi aðgerðir til að sporna við hamfarahlýnun hafa ekki gengið jafn langt og ég tel nauðsynlegt og sjálfsagt í ríkisstjórn undir forystu grænnar hreyfingar.

Síðastliðin tvö ár hef ég upplifað að samstarfið hefti mig í að vinna af fullum krafti fyrir þeim hugsjónum sem ég var kosinn fyrir. Nú er svo komið að ég tel fullreynt að ég geti sinnt þingstörfum eftir samvisku minni og sannfæringu við núverandi aðstæður.

Fyrr í dag kvaddi ég félaga mína í þingflokki Vinstri grænna og þakkaði þeim samfylgdina. Ég hef tilkynnt forseta Alþingis að ég hafi sagt mig úr þingflokknum og muni starfa sem þingmaður utan þingflokka,“ skrifar Andrés.

ingvarthor's picture
Ingvar Þór Björnsson
Fréttastofa RÚV
Síðast:
Þessi þáttur er í hlaðvarpi